Magin Mapaggirumdom sa Magasin Ngonyan na Oktubre
1 An Torrengbantayan asin Awake! igwa kan nakapakokosog na mensahe nin daing katapusan na maogmang bareta. An pagigin mapaggirumdom sa magasin nangangahulogan nin maingat na pagbasa kan mga iyan tanganing maheling kun paano an mga artikulo puwedeng makaakit sa mga tawo sa satong teritoryo.
2 Enot, magin pamilyar sa mga artikulo na itinampok sa tutob. An mga ilustrasyon mismo sa tutob parateng makakapahiro sa kagharong na akoon an mga magasin. Pumili nin mga artikulo na makakaakit sa mga tawo sa saindong teritoryo. An mga tawo daw sa pundamental sasaro an relihiyosong pagtubod? Ano an saindang pangenot na mga kinahahaditan? Nasa isip an mga puntong ini, puwede kamong mag-andam nin epektibong pag-atubang. Mangnoha an mga itinao sa ibaba.
3 Kun iinaalok nindo an Oktubre 1 “Torrengbantayan,” puwede nindong itampok an artikulong “An Biblia—Ano an Tunay na Halaga Kaiyan?” Puwede kamong magsabi:
◼ “Makakanompong kamo nin Biblia sa dakol na harong sa satong komunidad. Dakol sa sainda an nakakamate na iyan igwa nin sarong bagay na may espesyal na halaga.” Dangan puwede kamong maghapot: “Ano sa paghona nindo an minagibo sa Biblia na napapalaen?” Pakasimbag kan kagharong, puwede kamong magsabi: “Igwa nin kadakoldakol na ebidensia na mapatunay na an Biblia ipinasabong nin Dios asin sarong masasarigan na giya para sa sato. Igwa iyan nin kaaraman na puwedeng gumiya sa sato pasiring sa buhay na daing katapusan. [Basahon an Juan 17:3.] Dakol na tawo an iginagalang iyan pero dai aram kun paano gagamiton iyan. An artikulong ini sa An Torrengbantayan nagpapaliwanag kun paano nindo personal na magagamit an Biblia tanganing manompongan an mga simbag sa saindong mga hapot dapit sa ngapit.” Ipaliwanag an areglo sa suskripsion asin ialok iyan sa kagharong.
4 Ginagamit an Oktubre 15 “Torrengbantayan,” puwedeng booton nindo an simpleng pag-atubang na siring kaini:
◼ “Haros gabos nagadanan na nin namomotan. An artikulong ini nagpapalataw kan hapot na: ‘Ano an Kamugtakan kan mga Gadan?’ Ano sa paghona nindo an nangyayari kun magadan an saro? [Pasimbagon.] Kun boot nindong maaraman kun paano sinisimbag kan Biblia an hapot na iyan, maoogma akong iwalat saindo an kopyang ini kan magasin. Siring man, puwede kamong regular na magresibi kan magasin na ini paagi sa sarong suskripsion.”
5 An Oktubre 22 na “Awake!” nagsisiyasat sa saro sa dakol na ebidensia na nagpapaheling kan pagkasudya kan falsong relihiyon. Ginagamit an mga artikulo manongod sa “When Religion Takes Sides in War,” puwede kamong maghapot:
◼ “Kun yaon digdi si Jesus ngonyan, ano sa paghona nindo an mamamatean nia dapit sa gabos na kadahasan sa palibot niato. [Pasimbagon.] Tinokdoan kita ni Jesus na kamotan an gabos, minsan an satong mga kaiwal. Alagad, dakol na relihiyon na naghihingakong Kristiano an minakampi sa politikal na mga iriwal. Ano sa paghona nindo an epekto kaiyan sa mga tawo na boot na mamuhay sono sa itinokdo ni Jesus? [Pasimbagon.] An luwas na ini kan Awake! ipinaliliwanag an nakariribok na hapot na iyan asin nagpapaliwanag kun paano matao nin simbag an Kahadean nin Dios.”
6 Magmaigot na ialok an mga magasin sa lambang pinto, dawa kun dai nindo ikapaliwanag an Biblia. Iyo, magin mapaggirumdom sa magasin ngonyan na Oktubre!