Sarong Espesyal na Kingdom News Para sa Gabos
1 Poon kan Abril 24, pinonan niatong iwaras an espesyal na Kingdom News na nakapukaw kan interes nin nahahadit na mga tawo sa gabos na lugar! An mensahe kaiyan bako sanang napapanahon kundi apurado man. An mga parahayag sa kada kongregasyon ipinahayag an pagmawot na ipasakamot an mensaheng ini sa rinibong tawo. Kamo daw naghihingoa para sa lubos na pakikikabtang?
2 An supisyenteng suplay nin Kingdom News ipinadara sa kada kongregasyon. Pira an ikinawaras nindo? Kun dai nindo nagibo an siring sa linaoman nindo, makakagibo daw kamo nin orog pa bago matapos an pagwaras sa Mayo 14? Ano daw kun magpalista kamo bilang auxiliary payunir?
3 Rerepasohon kan kamagurangan kun baga an gabos na teritoryo matatapos sa Mayo 14. Kun dai, maninigong kontakon kan kamagurangan an kataraed na kongregasyon tanganing patabang. Paagi sa satong bilog na pusong mga paghihingoa, kaiba an marahay na pakikikooperar sa pag-oltanan nin mga kongregasyon, siertong matatapos an gibohon.
4 Posibleng nakaeksperyensia kamo nin dagdag na kagayagayahan sa gibohon na ini huli ta kadakol kan nakapakikabtang, kabale an bagohan na mga parahayag asin hobenes. Logod, an espiritung ini nin kagayagayahan magpadagos, na pinakokosog an gabos na gumibo nin mga pagdalaw liwat sa mga naghimate. Dinagka kita na magkaigwa nin tamang mga house-to-house record, na ilinilista an mga nagpaheling nin interes. An paghinanapos kan Mayo magigin marahay na panahon na gumibo nin mga pagdalaw liwat na may pasohan na makapoon nin bagong mga pag-adal.
5 Ano an puwede niatong sabihon sa pagbalik ta? Puwede nindong manompongan na epektibo an pagsabi: “Tibaad nagigirumdoman nindo an tract na iwinalat ko saindo dai pa sana nahaloy; naglalaom ako na nagkaoportunidad kamo na basahon iyan asin napaghorophorop an bagay. Tunay na an mensahe kaiyan nagin dahelan nin dakol na pag-orolay sa satong komunidad, huling iyan nagpapaliwanag kan mahahalagang isyu na napapaatubang sa bilog na katawohan.” Basahon an nagkapirang nakakapukaw sa isip na kapahayagan sa ikaduwang pahina, dangan maghapot: “Ano sa paghona nindo an kaipuhan tang gibohon tanganing masierto na andam kita sa itatao kan ngapit?” Pasimbagon. Kun ipinaheheling an interes, ipakipag-olay an iba pang punto sa pahina 2-4 kan Kingdom News, asin mag-alok nin pag-adal sa Biblia.
6 Kun naggigibo kamo sa teritoryo nin ibang kongregasyon, siertohon na itao sa kongregasyon na iyan an ngaran nin siisay man na interesado na manompongan nindo tanganing magibo kan mga parahayag sa kongregasyon na iyan an mga pagdalaw liwat.
7 An espesyal na pagwaras kan Kingdom News na ini nakapaogma asin nakamotibar sa sato gabos na dagdagan an satong mga paghihingoa sa paghuhulit kan Kahadean. Makakalaom kita na iyan magigin mapangganang marhay, na dinudugangan an pakaaram kan mga tawo sa gabos na lugar manongod sa dakulang ngaran asin katuyohan ni Jehova. (Isa. 12:4, 5) Mientras na mas dakol an nagigibo niato, dakol man an satong magigin kagayagayahan.—Sal. 126:3.