Kultibaron an Interes sa Kingdom News
1 Durante kan nakaaging pirang semana, naogma kita sa pribilehiong pagdistribwir kan Kingdom News Num. 35, na may temang “Magkakaminorootmootan Pa daw an Gabos na Tawo?” An mga parahayag sa gabos na lugar naghihingoang mapaabotan kan luwas na ini kan Kingdom News an pinakadakol na angay na mapupuede. (Mat. 10:11) Dawa ngani nakaiskedyul an kampanya na matapos sa Domingo, Nobyembre 16, kun igwa pa nin dakol na teritoryong kokobrehan, puedeng hagadon sa saindo kan kamagurangan na padagos na idistribwir an Kingdom News Num. 35 sagkod na maubos an suplay kan kongregasyon.
2 An luwas na ini kan Kingdom News nakapukaw sa interes nin dakol na tawo. Naheheling ninda na an kadaklan na tawo nawaran na kan saindang natural na kapadangatan asin kun siring nag-iisip-isip kun ano an natatagama sa ngapit. (2 Tim. 3:3) Boot niatong kultibaron an interes na napukaw na.
3 Nagkaigwa nin mga Resulta an Kingdom News: Durante kan 1995 kampanya sa Kingdom News, an sarong may edad nang tugang na babae nagpadara sa koreo nin nagkapirang kopya. An sarong babae na nakaresibi nin sarong kopya nagduman sa pagtiripon sa Kingdom Hall huli ta gusto niang makanood nin dakol pa manongod sa kun ano an paniniwala kan Mga Saksi ni Jehova. Sa pagtiripon na idto nag-ako sia nin pag-adal sa Biblia asin pakatapos kaiyan bihirang magpalta sa pagtiripon. Dai nahaloy, nagsurat sia sa dati niang iglesia, na tinatapos an saiyang pagigin miembro!
4 Sa ngonyan, ginatos na tawo sa teritoryo an nakabasa na kan mensahe sa Kingdom News Num. 35. Alagad ano an nagin reaksion ninda dian? Maski ngani hinangaan ninda an saindang nabasa, an kadaklan dai mahiro sagkod na sumongko giraray sa sainda an saro sa Mga Saksi ni Jehova. Nagpaplano daw kamong dumalaw liwat? An mamomoton na pagmakolog sa satong kapwa maninigong magpahiro sa sato na gibohon iyan. An gabos na nagpaheling nin interes sa Kingdom News maninigong dalawon giraray.
5 Ano an Sasabihon Nindo sa Saindong Pagdalaw Liwat? Puede kamong magkomento nin kadikit dapit sa mensahe sa Kingdom News dangan magtao nin nakapupukaw sa isip na hapot. Maghinanyog nin maingat mantang ipinahahayag kan kagharong an saiyang sadiri tanganing maaraman nindo an nasa isip nia. Dangan darahon an atension sa sarong angay na punto sa brosyur na Kahagadan, na itinampok sa Kingdom News. Kun maghimate sa saindo, pagmaigotan na makapoon tolos nin pag-adal sa Biblia.
6 Uya an nagkapirang isinuherir na pag-atubang na puede nindong probaran kun nagdadalaw liwat sa mga nagpaheling nin interes sa “Kingdom News” Num. 35:
◼ “Tibaad nagigirumdoman nindo an nasusurat na impormasyon na iwinalat ko sa saindo dai pa sana nahahaloy. An mensahe kaiyan nagkokomento manongod sa sarong mahalagang isyu na nakababanga sa katawohan ngonyan—an kadaihan nin pagkamoot sa iba.” Darahon an atension sa ebidensia na iinatubang sa pahina 2 kan Kingdom News sa irarom kan temang “Luminipot Na an Pagkamoot sa Kataed.” Dangan hapoton, “Sa paghona daw nindo katuyohan nin Dios para sa katawohan na mabuhay nin arog kaini?” Pasimbagon. Buksan sa leksion 5 kan brosyur na Kahagadan, asin pagmaigotan na makapoon nin pag-adal sa Biblia.
◼ “Kan enot kitang magkaolay, winalatan ko kamo nin sarong impormasyon manongod sa temang ‘Magkakaminorootmootan Pa daw an Gabos na Tawo?’ Sa paghona daw nindo posible an siring na kinaban?” Pasimbagon. Buksan sa leksion 6 kan brosyur na Kahagadan, asin basahon an parapo 6. Dangan basahon an panuga nin Dios sa Miqueas 4:3, 4. Kun garo baga interesado an kagharong, mag-alok nin brosyur asin pag-adal.
◼ “Kan nakaagi kong pagdalaw saindo, nagwalat ako nin sarong materyal na may temang ‘Magkakaminorootmootan Pa daw an Gabos na Tawo?’ Nag-aalok iyan nin daing bayad na pag-adal sa Biblia sa harong. Nagbalik ako tangani na ipaheling sa saindo an pantabang sa pag-adal na ginagamit niamo. [Ipaheling an librong Kaaraman.] Malinaw na ipinaliliwanag kan librong ini an manongod sa panahon na an gabos na tawo magkakaminorootmootan, asin sinisimbag kaiyan an iba pang mga hapot na tibaad hinohorophorop nindo: Taano kita ta naggugurang asin nagagadan? Taano ta tinotogotan nin Dios an pagdusa? Ano an nangyayari sa satong mga namomotan na nagadan? Puede daw na idemonstrar ko saindo an kurso nin pag-adal?” Kun sayumahan kan kagharong an alok nindo, hapoton sia kun boot niang basahon an libro na sia sana. Kun boot nia, alokan sia nin sarong kopya. Planohon na dumalaw giraray.
7 Oras na sirot na makobrehan an teritoryo kan Kingdom News Num. 35, puede niatong ialok an librong Kaaraman durante kan natatada pang mga aldaw ngonyan na bulan. An bastante na piniling isinuherir na mga pag-atubang para sa librong ini makukua sa likod na pahina kan An Satong Ministeryo sa Kahadean sa mga luwas na Marso, Hunyo, asin Nobyembre 1996; patin Hunyo 1997.
8 An espesyal na pagdistribwir na ini kan Kingdom News maninigong magmotibar sa sato gabos na dagdagan an satong mga paghihingoa sa paghuhulit. Sa tabang ni Jehova makakokompiar kita na an kampanyang ini magkakaigwa nin seguradong kapangganahan, na tinatabangan an mga tawo na maheling an katuyohan nin Dios na an gabos na tawo magkaminorootmootan. Padagos logod na bendisyonan ni Jehova an satong maigot na mga paghihingoa mantang kinukultibar niato an interes sa Kingdom News.