Pagkultibar kan Interes na Napukaw kan Kingdom News Num. 36
1 Natapos na daw nindo an pagdistribwir kan ipinadara sa saindo na Kingdom News Num. 36? Iyan nagpapalataw nin napapanahon na hapot para sa gabos tangani na horophoropon: “An Bagong Milenyo—Ano an Tagama kan Ngapit Para sa Saindo?” Kan nagdadangadang an taon 2000, magkakalaen na marhay an mga inaasahan kun ano an dadarahon kan bagong milenyo. Tinatratar kan Kingdom News Num. 36 an nagkapira sa mga inaasahan na iyan asin pinagigirumdom kita na an mga kamugtakan sa kinaban dai nagtatao nin basehan para sa optimismo. An solamenteng milenyo na magtatao kan katoninongan asin katiwasayan na hinahanap kan kadaklan na tawo iyo an Milenyal na Paghade ni Cristo Jesus. An satong kompiansa sa katunayan kan Kahadean nia pinahiro kita na idistribwir an Kingdom News Num. 36 sa gabos na puede niatong tawan.
2 Mga Reaksion sa Kingdom News: An nakaaging mga pagdistribwir kan Kingdom News nagin marahay na pan-engganyar sa sato sa satong gibohon. Mapadapit sa Kingdom News Num. 35, an sangang opisina sa Canada nagsurat: “An espesyal na kampanyang ini entusiastikong sinuportaran kan mga parahayag asin payunir sa langtad, asin dakol an nakamtan na nakaparirigon sa boot na eksperyensia.” Mayong duwa-duwa na ipinaheling man nindo an kaparehong entusiasmo sa pagdistribwir kan Kingdom News Num. 36.
3 An kampanya kan Kingdom News sa presente nakaiskedyul na matapos sa Nobyembre 17, 2000. Nakobrehan na daw an gabos na teritoryong asignado sa saindong kongregasyon? Kun dai pa, puedeng hagadon sa saindo kan kamagurangan na ipadagos an kampanya sagkod sa katapusan kan Nobyembre.
4 Ano an nagin reaksion sagkod ngonyan sa pagdistribwir kan Kingdom News Num. 36 sa saindong lugar? Pira sanang tawo an mallenar kan kupon patin mahagad nin kopya kan brosyur na Kahagadan asin/o pag-adal sa Biblia. Minsan siring, an mayoriya kan mga nagpapaheling nin enot na interes sa tema manongod sa milenyo posibleng dai maghiro sagkod na sumongko liwat an saro sa mga Saksi ni Jehova. An gabos na nagpaheling nin interes maninigong dalawon giraray. Noarin an marahay na panahon na gibohon ini? An pagkultibar maninigong sa pinakamadaling panahon na mapupuede.
5 Mangnoha an mga eksperyensiang ini na resulta kan pagdalaw liwat sa mga napasakamotan kan Kingdom News Num. 35. An sarong payunir sa Irlandia nagwalat nin Kingdom News sa kagsadiri nin sarong restawran. Naghanga an babae sa mensahe asin pinababalik nia an tugang na babae. Nagbalik an tugang na babae pakalihis nin duwang aldaw, asin naponan an sarong pag-adal sa Biblia. Sa Dinamarca, iwinalat an sarong kopya kan Kingdom News sa sarong harong na mayo ni sarong tawo. Kan aldaw man sanang idto ipinadara kan babae na nag-iistar duman an kupon sa sangang opisina, na ipinadara naman iyan sa lokal na kongregasyon. Bago matapos an semana, nagsongko an duwang tugang na babae, iinareglo an pag-adal, asin nag-atender an babae sa kaenot-enote sa pagtiripon sa Kingdom Hall!
6 Kun Ano an Sasabihon sa Pagdalaw Liwat Nindo: An pagdalaw liwat sa mga napasakamotan kan Kingdom News medyo pasil asin nakaoogmang kabtang kan satong ministeryo. Kun naggigibo kaiyan, marahay na magdara kamo nin kopya kan Kingdom News Num. 36, ta tibaad an kagharong mayo kan kopya nia. Puede nindong probaran an mga suhestion na ini.
7 Pakapagirumdom nindo sa kagharong kun siisay kamo, puede nindong sabihon:
◼ “Nagwalat ako nin pulyeto na may temang ‘An Bagong Milenyo—Ano an Tagama kan Ngapit Para sa Saindo?’ Bako daw na nakaparirigon sa boot na mabasa na sa dai na mahahaloy mapoon na an Milenyal na Paghade ni Cristo Jesus, na magdadara kan mga kamugtakan na Paraiso digdi sa daga? [Ipaheling an mga ilustrasyon kan Paraiso sa Kingdom News Num. 36.] Sa likod na pahina, iniimbitaran kamo na maghagad nin sarong kopya kan brosyur na Ano an Kahagadan sa Sato nin Dios?” Ipaheling an brosyur, buksan sa leksion 5, basahon an enot na hapot asin an parapo 1 saka 2, patin pakomentohon an kagharong. Basahon asin pag-olayan an saro o duwang teksto. Kun posible, pag-olayan an saro pang hapot asin parapo, dangan iareglo na madalaw liwat asin ipagpapadagos an pag-oolay.
8 Mantang an masunod na alok sa Nobyembre iyo an brosyur na “Kahagadan” o an librong “Kaaraman,” puede nindong sabihon:
◼ “Kan ako dumalaw sa saindo kasuarin pa sana, nagwalat ako nin kopya kan ‘An Bagong Milenyo—Ano an Tagama kan Ngapit Para sa Saindo?’ Iyan igwa nin alok na daing bayad na pag-adal sa Biblia. Nagdalaw liwat ako tangani na ipaheling saindo an pantabang sa pag-adal na ginagamit niamo. [Ipaheling an brosyur na Kahagadan, asin buksan sa likod na tutob; o ipaheling an librong Kaaraman, asin buksan sa pahina 188-9.] An Milenyo na sinasabi sa Biblia magdadara nin mga kamugtakan siring kan maheheling nindo sa ilustrasyon na ini. Tangani na makualipikar para sa buhay sa Paraiso, kaipuhan niatong ilaog sa isip an tamang kaaraman dapit sa Dios. Togotan tabi nindo akong idemonstrar sa halipot kun paano niamo pinag-aadalan an Biblia.”
9 An pagdistribwir kan Kingdom News Num. 36 minotibar kita na dagdagan an satong pakikikabtang sa ministeryo, na nagbubunga nin dakulang patotoo. Posibleng marhay na pinukaw kaini an interes kan dakol na indibiduwal sa teritoryo. An satong sararong paghihingoa na kultibaron an interes na ini maresulta, sa tabang ni Jehova, sa satong magayagayang pakanompong nin dakol pang arog-karnero.—Mat. 10:11; Gibo 13:48, 49, 52.