Gamiton nin Tama an Saindong Panahon

¹ Si Jehova mapagrisa sa oras. Mawot nia na kita magin mapagbantay man sa oras. Tinatabangan nia kita paagi sa saiyang organisasyon na magin mapagrisa sa oras. Permi nia kitang sinasadol na magin “dakol an gigibohon sa gibohon kan Kagurangnan.” (1 Cor. 15:58) Sa paaging ini, magigin mas epektibo kita sa paglilingkod ki Jehova.

² An kada saro sato igwa nin pararehong lawig nin oras kada semana​—168 oras. Gurano karahay niatong ginagamit an satong oras? Ipinaheheling daw niato na aram ta kun anong oras na sa pagmansay ni Jehova? Nalilingling daw kita sa mga bagay na dai kaipuhan?

³ Mahalaga na kita magin organisado. Prinobaran nin dakol na magmantener nin listahan nin pinaoorog na mga bagay. An kada bagay ilinalaag sa lista basado sa importansia kaiyan. Paano iyan madedeterminaran? An Biblia nagsasabi na an saro maninigong “magkamit nin karahayan sa gabos niang hinigosan.” (Ecl. 3:13) An nagkapirang trabaho nagbubunga nin mas marahay na resulta kisa iba. Konsideraron an mga resulta na dadarahon kan lambang trabaho. An pagtapos daw kan trabaho mapaluwas nin importanteng mga pakinabang? Kamo daw ‘magkakamit nin karahayan’ sa saindong hinigosan? Kun dai, tibaad iyan bakong importanteng marhay.

⁴ Sa Satong Ministeryo: Inaapresyar niato kun an iba minaabot nin tama sa oras sa mga pagtiripon bago maglingkod. nagdadangog nin maingat sa mga instruksion, asin minahale tolos pasiring sa teritoryo. Mas mamawoton niato na magin sibot sa paghuhulit kisa sa maghalat. Risang namatean na gayo ni Pablo an pangangaipo para sa marahay na areglo kan sia magsurat: “Gibohon an gabos na bagay sa disente asin aregladong paagi.”​—1 Cor. 14:40.

⁵ Kun kita yaon sa langtad nin paglilingkod, puedeng mawaran kita nin mahalagang oras sa mga pagmeryenda. Alagad, pakatapos nin halawig na mga oras sa paglilingkod puede kitang magpahingalo nin kadikit. O tibaad kun maraot nanggad an panahon, an pagpahingalo maparepresko asin matabang sato na magpadagos. Dakol, minsan siring, an gusto na magin sibot sa paghuhulit sa mga tawo asin dai na nguna makipagtipon-tipon sa mga tugang sa mga pagmeryenda sa panahon na itinagama para sa ministeryo. Kaipuhan an pagigin balanse.

⁶ “Minsan an kagang . . . aram na gayo . . . an itinalaan na mga panahon para kaiyan” na bumalyo sa ibang lugar, asin an tanga ‘inaandam an pagkakan kaiyan minsan sa tig-init’ tanganing magin andam para sa tiglipot, an sabi kan Biblia. (Jer. 8:7; Tal. 6:​6-8) Yaon dian an sekreto nin tamang paggamit nin panahon. Dapat na ‘aram man niato an satong itinalaan na mga panahon.’ Bako man na sobra kaestrikto, kita dapat na magin mapagrisa sa oras. Kaipuhan na aram niato bako sanang an dapat niatong gibohon kundi kun noarin iyan dapat matapos. Dapat na ugaleon niato na mag-isip nin patienot, na nagtatagama para sa mga pagkaatraso. Asin dapat man na magin andam kitang inaan an ibang aktibidad tanganing tawan nin panahon an mas importanteng bagay, siring sa pag-andam para sa satong mga pagtiripon, ministeryo sa langtad, asin iba pang teokratikong mga aktibidad.

⁷ Gusto niato na magin arog kan satong langitnon na Ama, si Jehova Dios, na nagtotokdo sato na “sa gabos na bagay igwa nin itinalaan na panahon.” (Ecl. 3:1) Paagi sa tamang paggamit kan satong panahon, puede niatong ‘lubos na otobon an satong ministeryo.’​—2 Tim. 4:5.