Kristianong Ugale sa Eskuelahan
1 Kun kamo sarong Kristianong barobata na nag-eeskuela pa, kaipuhan nindo nin makosog na pagtubod na papagdanayon an saindong integridad. Mahalaga na iaplikar nindo an hatol ni Pedro na “papagdanayon na marahay an saindong ugale sa tahaw nin mga nasyon, tanganing . . . tibaad huli sa saindong marahay na mga gibo na saindang naheheling pamurawayon ninda an Dios.” (1 Ped. 2:12) Kaipuhan nindo nin kapusoan na atubangon an angat na ini.
2 Sa laog o sa luwas nin eskuelahan, kamo binobomba nin pagdodorog bago kasalon, malaswang mga tataramon, tabako, asin pag-abuso sa droga. Kada aldaw, may napapaatubang sa saindong mga sugot na tibaad makaraot sa saindong marahay na ugale. Siring sa mga adulto, dapat kamong “makipaglaban nin maigot para sa pagtubod” tanganing matagalan nindo an siring na mga pagbalo.—Jud. 3; helingon an Hulyo 15, 1991 Watchtower, pahina 23-6.
3 Sa eskuelahan, yaon an patriotikong mga seremonya asin kinabanon na mga kapiestahan. Kun lumataw an depisil na situwasyon, kamo daw ‘nagpapadanay nin marahay na konsensia, tanganing mapasopog an mga nagpapakaraot sa saindong marahay na gawe’?—1 Ped. 3:16.
4 Tibaad matentaran kamo kan mga aktibidad sa isport o sosyal na mga pagtiripon sa eskuelahan. Dapat kamong magin alisto na midbidon kun paano puedeng ikompromiso an saindong pagtubod kan garo baga nakaoogmang mga aktibidad na ini. Kaipuhan na pumili nin kairiba na puede kamong magkaigwa nin “pagriribayan nin pagpakosog,” na an kada saro napakokosog paagi sa pagtubod kan saro.—Roma 1:12.
5 Makatatagal Kamo, Paagi sa Tabang ni Jehova: Danay na binabalo ni Satanas an saindong pagtubod. An mga pagbalo na dapat nindong tagalan puedeng magin makuri, alagad an mga balos nagpapangyari kaiyan gabos na magin kapakipakinabang. (1 Ped. 1:6, 7) Dai kamo makakapanggana paagi sa sadiri nindong kosog; dapat kamong magpatabang ki Jehova. Sinadol ni Jesus an saiyang mga disipulo: “Magpuka kamo asin padagos na mamibi, tanganing dai kamo makalaog sa sugot.” (Mat. 26:41) Mahalaga an disiplina asin pagpopogol sa sadiri.—1 Cor. 9:27.
6 Permi nindong girumdomon na maninimbag kamo ki Jehova, na nakaheheling kan gabos nindong ginigibo. (Ecl. 11:9; Heb. 4:13) An odok na pagmawot na paogmahon sia maninigong magpahiro sa saindo na “maghingoa na makamtan an saindong kaligtasan na may takot asin pagtakig.” (Fil. 2:12) Dakulang tabang an pagbasa kan Tataramon nin Dios aroaldaw.
7 Kaipuhan na aram kan mga magurang an mga problemang inaatubang kan mga aki, asin tumabang sinda kun kinakaipuhan. Mga magurang, itinanom daw nindo sa saindong mga aki an pakasabot sa mga pagboot asin prinsipyo nin Dios? Kun napapaatubang sa mga sugot, marigon daw an saindong mga aki, o sinda daw madaling minasuko? Nadidisganar daw sinda huli ta dapat sindang mapalaen sa saindang mga kaedad? Kun pinapakarhay nindo an saindong trabaho, matatabangan nindo sinda na manggana sa pakikilaban para sa pagtubod.—Deut. 6:6, 7; Tal. 22:6.