Pagkondukta nin Progresibong mga Pag-adal sa Biblia sa Harong
1 May anong pagkakapareho an sarong nars sa Tanzania, sarong hoben sa Argentina, asin sarong ina sa Latvia? An 1997 Yearbook (p. 8, 46, asin 56) nagbabareta na an tolo gabos marikas na nag-oswag sa saindang mga pag-adal sa Biblia sa harong, huli sa saindang gikan sa boot na pag-adal nin labi sa sarong beses kada semana sa librong Kaaraman. Irinekomendar kaidto na kun posible, maninigong pagmaigotan na ipakipag-olay kan mga parahayag an sarong kapitulo kan libro durante kan kada pag-adal. Minsan siring, an nagkapira nasasakitan na gibohon iyan. Dawa ngani dakol an madepende sa mga sirkumstansia asin sa kakayahan na makanood kan lambang estudyante, nakanompong nin kapangganahan an eksperyensiadong mga paratokdo paagi sa paggibo kan minasunod na mga suhestion.
2 Siring sa pagkapaliwanag sa Hunyo 1996 na suplemento kan An Satong Ministeryo sa Kahadean, kaipuhan na sanayon an saindong mga estudyante na mag-andam para sa pag-adal. Sa pagpoon pa sana, marahay na ipaliwanag asin idemonstrar kun paano ini ginigibo. Ipaheling sa sainda an saindong personal na kopya kan librong Kaaraman. Andamon na magkaibanan an enot na leksion. Tabangan an mga estudyante na hanapon an pangenot na mga termino o frase na direktang minasimbag sa nasusurat na hapot dangan kuritan o markahan iyan. May mga parahayag na tinawan pa ngani an saindang mga estudyante nin panmarka na magagamit. Enkaminaron sindang hanapon an gabos na teksto mantang nag-aandam sinda para sa pag-adal. Paagi sa paggibo kaini, sasanayon man nindo sinda na mag-andam para sa pag-atender sa Pag-adal sa Libro kan Kongregasyon asin sa Pag-adal sa Torrengbantayan.—Luc. 6:40.
3 An marahay na paratokdo eenganyaron an estudyante na magtaram asin bakong sia mismo an magpaparataram. Linilikayan niang malingling sa saradit na punto. Bihira siang magdagdag nin materyal. Imbes, itinatampok nia an pangenot na mga punto kan leksion. May nagkapira na tinawan an mga estudyante nin dagdag na babasahon tangani na tabangan sindang manompongan an simbag sa mga hapot. Dugang pa, maako an mga interesado nin dagdag pang detalyadong impormasyon paagi sa pag-atender sa mga pagtiripon kan kongregasyon.
4 Tibaad dai kaipuhan na hanapon an gabos na sitadong teksto sa leksion. An nagkapirang pangenot na punto puedeng ipaliwanag gikan sa kotadong mga teksto sa parapo. Durante kan repaso, itampok an pangenot na mga teksto na ipinaliwanag asin enkaminaron an estudyante na girumdomon an mga ini.
5 Maninigong Gurano Kalawig an Kada Sesyon?: Dai kaipuhan na limitaran an pag-adal sa sarong oras. May mga kagharong na may panahon asin tibaad mawoton na mag-adal nin mas halawig. O tibaad booton kan estudyante na mag-adal nin labi sa sarong beses kada semana. Magigin kapakipakinabang ini para sa mga makagigibo kaiyan.
6 Siring sa paglaladawan kan Isaias 60:8, ngonyan ginatos na ribong bagong paraomaw ki Jehova an “nagrurulupad na garo panganoron, asin garo mga salampati sa mga gaha kan saindang harong-harong” sa mga kongregasyon kan saiyang banwaan. Gibohon niato gabos an satong kabtang sa dayupot na pakikipagtabangan ki Jehova mantang pinaririkas nia an pagtipon sa mga arog-karnero.—Isa. 60:22.