Ano an Saindong Reaksion sa Pagkaindiperente?
1 An pagkaindiperente kawaran nin pagmate o emosyon, kadaihan nin interes o pagmalasakit. Iyan saro sa mas lakop asin mas masakit na mga aktitud na natutuparan niato sa ministeryo. Ano an saindong reaksion dian? Nagcausa daw iyan na kamo magluwayluway sa saindong ministeryo? Paano nindo mapanggaganahan iyan tangani na mapaabotan an mga tawo kan mensahe kan Kahadean?
2 Enot, aramon kun taano an mga tawo sa saindong teritoryo ta indiperente. Iyan daw huli ta sinda nadedesganar sa saindang politikal asin relihiosong mga namomoon? Nakamamate daw sinda na mayo nang luluwasan sa mga problema na napapaatubang sa sainda? Sinda daw mapagduda dapit sa mga panuga manongod sa orog karahay na bagay? Sinda daw habong mag-isip manongod sa espirituwal na mga bagay apuera sana kun naheheling ninda an tolos-tolos na aktuwal na mga pakinabang?
3 Itampok an Paglaom sa Kahadean: Mayong problema na dai mareresolberan kan Kahadean. Kaya kun magigibo niato an siring, maninigo kitang magtaram manongod sa mga panuga kan Kahadean, na sinasambit an pangenot na mga tataramon sa Kasuratan, dawa ngani bakong posible o praktikal na ipaheling an sarong teksto sa Biblia. (Heb. 4:12) Minsan siring, paano niato mapoponan an orolay sa puntong iyan?
4 Kaipuhan na masabotan nin mga tawo an katuyohan kan satong pagdalaw. Kaipuhan na marealisar ninda na yaon kita huli sa pagkamoot sa kataed asin pagmalasakit sa komunidad. Puede kitang tumao nin pinag-isipan na marhay na hapot siring kan, “Ano sa paghona nindo an solusyon sa [sarong problema na nakaaapektar sa komunidad]?” Kun bakong epektibo an sarong pagdolok, probaran an saro pa.
5 Sa sarong may kayang marhay na teritoryo na an mga kagharong indiperente sa mensahe kan Kahadean, naghingoa an mga parahayag na humanap nin introduksion na mapukaw nin interes. Kan itinatampok an librong Kaaraman, prinobaran nin sarong mag-agom an introduksion na ini: “Naniniwala daw kamo na an marahay na edukasyon mahalaga para sa kapangganahan sa kinaban ngonyan? Minaoyon daw kamo na an sarong marahay na edukasyon kabale an kaaraman sa Biblia?” Sa saro sanang hapon nakapasakamot sinda nin tolong libro, na an saro kaiyan sa sarong babae na kan huri nagsabi na nabasa na nia an bilog na librong Kaaraman asin uminoyon na mag-adal sa Biblia.
6 Kun nakatutupar kamo nin pagkaindiperente, probaran an laen-laen na pagdolok, maghapot nin mga nakapupukaw sa isip, asin gamiton an puersa kan Tataramon nin Dios. Sa siring puede nindong matabangan an iba na akoon an satong makangangalas na paglaom sa Kahadean.