“Dai Ako Interesado”

¹ Iyan ordinaryo na sanang reaksion sa satong mensahe sa nagkapirang lugar. Ano an matabang sa sato na malikayan na panluyahan nin boot kun napapaatubang sa pagkaindiperente sa teritoryo? Paano niato puedeng mahimo na pukawon an interes kan mga tawo sa maogmang bareta?

² Papagdanayon an Kagayagayahan: An paggirumdom kun taano ta dakol na tawo an indiperente matabang sa sato na papagdanayon an kagayagayahan. An mga tinokdoan kan teoriya nin ebolusyon o pinadakula sa ateistikong sosyedad tibaad dai inisip-isip an kahalagahan kan Biblia. An iba tibaad desganado huli sa pagsaginsagin na naobserbaran ninda sa relihion. Para sa nagkapira, an pagkaindiperente ninda tibaad nagpapabanaag kan saindang pagkadesganar asin kadaihan nin paglaom. (Efe. 2:12) An nagkapira ‘dai nagmamangno’ huli ta nagagabatan sinda sa mga kahaditan sa buhay.—Mat. 24:37-39.

³ Sa ibong kan negatibong reaksion nin nagkapira, magkakaigwa kita nin kagayagayahan sa ministeryo, sa pakaaram na nagpapamuraway ki Jehova an mga paghihingoa niato. (1 Ped. 4:11) Dugang pa, an pakikipag-olay manongod sa katotoohan, dawa sa mga dai pa nagpapahalaga kaiyan, nagpapakosog sa sato mismong pagtubod. Hingoahon niato na mansayon an mga tawo sa teritoryo siring sa pagmansay ni Jehova. Naherak sia sa mga tawo sa Ninive na dai “nakakaaram kan pagkakalaen kan saindang toong kamot sa saindang wala.” (Jon. 4:11) An mga nakaistar sa teritoryo niato nagkakaipo kan maogmang bareta! Kun siring, dai kita maninigong sumuko kundi maninigo kitang maghanap nin mga paagi na makakapukaw kan interes ninda sa mensahe kan Biblia.

⁴ Ipakipag-olay an Lokal na mga Ikinakapurisaw: Tibaad puede nindong sambiton sa saindong introduksion an sarong lokal na ikinakapurisaw asin hagadon sa kagharong na ipahayag an saiyang mga punto de vista. Maghinanyog mantang nagtataram sia, dangan ipaheling sa saiya an nakakarangang mensahe kan Biblia bilang simbag sa saiyang mga ikinakapurisaw. Pakatapos nin lokal na trahedya, ipinahayag nin sarong Saksi sa kada kagharong an saiyang sinserong pakikidamay. “Bigla na sana, nagpoon nang makipag-olay an mga tawo,” an sabi nia. “Nagkaigwa ako nin dakol na marahayon na pakikipag-olay kan aldaw na idto huli ta nagpaheling ako nin personal na interes sa sainda.”

⁵ An lambang problema na napapaatubang sa katawohan reresolberan paagi sa Kahadean nin Dios. Pagmaigotan na batidon an problema na ikinakapurisaw na marhay kan kagharong. Tibaad togotan nia kamong ipaliwanag an mensahe nin paglaom kan Biblia. Kun dai, tibaad andam siang maghinanyog “sa ibang panahon.”—Gibo 17:32.