Gusto Kong Magkaigwa nin Inaadalan sa Biblia!
1 Dakol sa sato an nagpahayag nin pagmawot na magkaigwa nin inaadalan sa Biblia, asin may marahay na dahelan. Sa gibohon na pag-adal sa Biblia niato naaabot an satong pasohan na paggibo nin bagong mga disipulo. (Mat. 28:19, 20) Alagad ta dakol sa sato an pinaagi an mga bulan, tibaad taon, na dai naeksperyensiahan an espesyal na kagayagayahan na minagikan sa pagtotokdo kan katotoohan. Ano an satong magigibo dapit kaini ngonyan na Nobyembre? Mantang itinatampok an librong Kaaraman ngonyan na bulan, makagigibo kita nin espesyal na paghihingoa na gamiton iyan tangani na makapoon nin bagong mga inaadalan sa Biblia.
2 Magtagama nin Saro o Labi Pang Katapusan kan Semana: Ineenkaminar niamo an gabos na magtagama nin panahon ngonyan na bulan na magkonsentrar sa pagpoon nin bagong inaadalan sa Biblia. Maninigong pilion kan mga konduktor sa Pag-adal sa Libro kan Kongregasyon an (mga) katapusan kan semana na gagamiton partikularmente sa katuyohan na ini dangan organisaron an saindang grupo na durungan na maghingoa sa pagdalaw liwat.
3 Darahon an saindong mga rekord nin pagdalaw liwat sa mga pagtiripon na ini bago lumuwas sa paglilingkod. Dangan songkoon an gabos na nagpaheling nin interes, nagkua nin literatura, o nag-atender sa mga pagtiripon. Magsongko na an espesipikong katuyohan makapoon nin pag-adal.
4 Idemonstrar an Pag-adal sa Biblia: Sa piniling mga pagtiripon bago lumuwas sa paglilingkod, maninigo na iatubang an sarong inandam na marhay na demonstrasyon, na ipinaheheling kun paano makapopoon nin pag-adal sa sarong dinadalaw liwat. Puede nindong sabihon: “Dakol an igwa nin Biblia, alagad dai ninda narerealisar na iyan nagtatao nin simbag sa importanteng mga hapot na inaatubang niato gabos sa buhay. [Ipaheling an mga laog sa librong Kaaraman, asin basahon an titulo kan kapitulo 3, 5, 6, 8, asin 9.] Paagi sa paggamit kan pantabang na ini sa pag-adal sa laog nin sarong oras o labi pa kada semana, puede kamong magkamit nin pundamental na pakasabot sa Biblia sa laog sana nin pirang bulan. Kun boot nindong pumili nin saro sa mga topikong ini, maoogma akong ipaheling sa saindo kun paano ginigibo an programang iyan.” Kun nag-aalangan siang mag-adal huli sa sibot na iskedyul, ipaliwanag na igwa man kita nin pinahalipot na programa. Iintrodusir an brosyur na Kahagadan, asin alokon na pag-adalan an sarong halipot na leksion kada semana sa laog nin 15-30 minutos.
5 Kun kita gabos sararong maghihingoa na makapoon nin mga pag-adal asin kun kita mamimibi na logod bendisyonan ni Jehova an satong paghihingoa, kita seguradong makakukua nin bagong mga inaadalan! (1 Juan 5:14, 15) Kun gusto nindong magkaigwa nin inaadalan sa Biblia, tibaad ini na an saindong oportunidad na makapoon nin saro.