‘Isolog an Bagong Personalidad’
1 Pinahahalagahan nin mga Kristiano an pakaaram kan katotoohan! Nanodan niato kun paano mamumuhay tanganing malikayan an dalan kan mga nasa kinaban. Huli sa pagigin “siblag sa buhay na gikan sa Dios,” sinda “nasa kadikloman sa isip.” (Efe. 4:18) Tinokdoan kita na bagohon an satong isip gikan sa kinabanon na kaisipan paagi sa paghuba kan daan na personalidad asin pagsolog kan bago.—Efe. 4:22-24.
2 An daan na personalidad minapasiring sa sarong dagos-dagos na dalan nin pagkalaglag sa moral, na nagreresulta sa ramog asin kagadanan. Kun siring, odok niatong hinahagad sa mga mahinanyog sa mensahe kan Kahadean na haleon an gabos na kabangisan, kaanggotan, karatan, mapanlibak na pagtaram, asin malaswang orolay. An mga nagmamawot na oyonan nin Dios kaipuhan na desidido asin biyong haleon an daan na personalidad—sa paagi na hinuhuba ninda an maating gubing.—Col. 3:8, 9.
3 Sarong Bagong Puersa na Nagpapahiro sa Isip: Kalabot sa pagsolog kan bagong personalidad an pagigin nabago sa puersa na nagpapahiro sa satong isip. (Efe. 4:23) Paano binabago nin saro an puersa, o mental na disposisyon na iyan, tangani na ikakiling sa tamang direksion? Ginigibo ini paagi sa regular asin mahigos na pag-adal sa Tataramon nin Dios patin paghorophorop sa kahulogan kaiyan. Dangan, minatalubo an sarong bagong dalagan nin kaisipan, asin nasasabotan nin saro an mga bagay sa punto de vista nin Dios asin ni Cristo. Naliliwat an buhay nin saro mantang ginugubingan nia an saiyang sadiri nin dakol na arog-Cristong kualidad, kabale an pakikidamay, kabootan, kababaan nin boot, kahoyoan, pakatios, asin pagkamoot.—Col. 3:10, 12-14.
4 Paagi sa pagsolog kan bagong personalidad, ilinalaen niato an satong sadiri sa kinaban. An satong pamumuhay pinangyayari kitang naiiba. Nagtataram kita nin totoo asin naggagamit nin marahay na pagtaram sa pagparigon sa iba. Kinokontrol niato an satong kaanggotan, kapaitan, sirilyakan, panlilibak, asin gabos na karatan asin sinasalidahan an mga ini nin matanos, diosnon na mga kualidad. An ginigibo niato labi pa sa parateng kahagadan sa sato na pagigin mapagpatawad. Ini gabos madaling nagigibo gikan sa puso.—Efe. 4:25-32.
5 Dai noarin man paghubaon an bagong personalidad. Dai niato mapaglilingkodan si Jehova sa inooyonan na paagi kun mayo iyan. Togotan iyan na makatabang sa mga tawo na maakit sa katotoohan, asin togotan iyan na pamurawayon si Jehova, an Kaglalang kan satong makangangalas na bagong personalidad.—Efe. 4:24.