Imbitaran Sinda na Umatender
1 An imbitasyon na itinao dakol nang siglo an nakaagi ibinabalangibog ngonyan sa 233 na kadagaan sa bilog na kinaban: “Madia kamo, banwaan, asin tumukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.” (Isa. 2:3) An paggiya sa mga tawo pasiring sa organisasyon ni Jehova saro sa pinakamarahay na paagi na matatabangan niato sinda na umoswag sa espirituwal na minagiya pasiring sa buhay na daing katapusan.
2 An nagkapirang parahayag tibaad nag-aalangan na imbitaran an mga tawo sa Kingdom Hall sagkod na dai pa sinda nakapaheheling nin awad-awad na pag-oswag sa pag-adal sa Biblia sa harong. Minsan siring, kun beses minapoon an mga tawo na umatender sa mga pagtiripon kan kongregasyon bago pa ngani maponan na adalan sinda sa Biblia. Dai kita maninigong mag-atraso sa pagpaabot nin mainit na imbitasyon asin pag-enkaminar sa mga tawo na umatender sa mga pagtiripon.
3 Kun Ano an Gigibohon: Gamiton nin marahay an mga handbill sa pag-impormar sa mga tawo manongod sa satong lokal na mga pagtiripon. Sambiton na an mga pagtiripon mayong bayad asin na mayo nin pangongolekta. Ipaliwanag kun paano kinokonduktahan an mga pagtiripon. Sabihon na iyan aktuwal na mga kurso nin pag-adal sa Biblia asin na an materyal na pinag-aadalan itinatao sa gabos tangani na masubaybayan iyan. Darahon an atension sa laen-laen na pinaghalean asin klase nin pamumuhay kan mga nag-aatender. Sambiton na sinda mga taga duman sa lugar asin na maogmang inaako an mga aki ano man an edad. Maninigo niatong imbitaran an mga inaadalan niato, na nag-aalok na tabangan sinda sa ano man na paagi tangani na makaatender.
4 An saro sa ultimong mga bagay na nasusurat sa Biblia iyo an mainit na imbitasyon na makikabtang sa mga probisyon ni Jehova para sa buhay: “Asin an espiritu asin an nobya padagos na nagsasabi: ‘Madia!’ . . . Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kap. 22:17) Mayo nin ikasasalida sa pag-imbitar sa iba na umatender sa satong mga pagtiripon.
5 An Isaias 60:8 makahulang ilinaladawan an ginatos na ribong bagong paraomaw ngonyan na naglalaog sa mga kongregasyon kan banwaan nin Dios siring sa mga salampati na “nagrurulupad na garo panganoron, asin garo mga salampati sa mga gaha kan saindang harong-harong.” Puede niato gabos na imbitaran an mga bagohan sa satong mga pagtiripon asin ipamate na sinda maogmang inaako. Paagi kaini, kita makikikooperar ki Jehova mantang saiyang pinaririkas an pagtipon.—Isa. 60:22.