Mga Magurang—Magpaheling nin Marahay na Halimbawa sa Saindong mga Aki
1 An Tataramon nin Dios nagsasabi sato na “an ama [asin an ina] nin sarong matanos siertong magigin magayagaya.” (Tal. 23:24, 25) Abaang bendisyon para sa mga magurang na nagpaheling nin marahay na halimbawa sa saindang mga aki! An sarong miembro kan Komite kan Sanga nagsabi manongod sa saiyang magurang: “An katotoohan iyo an bilog nindang buhay, asin gusto ko man na gibohon iyan na bilog kong buhay.” Ano an maninigong maheling kan mga aki sa saindang mga magurang?
2 Marahay na Ugale Asin Hararom na Paggalang: Paninimbagan kan mga magurang na itadom sa saindang mga aki an kapakipakinabang na mga karakteristiko. An marahay na ugale nanonodan, bako lang paagi sa berbal na pagtotokdo, kundi paagi sa obserbasyon asin pag-arog. Kun siring, anong mga ugale an ipinaheheling nindo? Nadadangog daw kamo kan saindong mga aki na magsabi nin “dispensara tabi ako,” “tabi,” asin “salamat”? Sa laog kan pamilya, tinatratar daw nindo an lambang saro na igwa nin hararom na paggalang? Nagdadangog daw kamo kun an iba nagtataram? Nagdadangog daw kamo kun an saindong mga aki nakikipag-olay sa saindo? An marahay na mga karakteristikong ini naheheling daw sa Kingdom Hall patin sa harong?
3 Makosog sa Espirituwalidad Asin Maigot sa Aktibidad: Nagigirumdoman nin sarong tugang na lalaki na naglabing 50 taon sa pambilog na panahon na paglilingkod: “An sakong ina asin ama marahayon na halimbawa sa saindang pag-apresyar sa mga pagtiripon asin sa saindang kaigotan sa ministeryo.” Paano nindo ipinaheheling sa saindong mga aki na kamo interesado na papagdanayon an espirituwalidad kan kasararo nindo sa harong? Pinag-oolayan daw nindo an teksto sa aroaldaw na magkairibanan? Igwa daw kamo nin regular na pampamilyang pag-adal? Naheheling daw kamo kan saindong mga aki na nagbabasa nin Biblia asin mga publikasyon kan Sosyedad? Ano an saindang nadadangog kun kamo namimibi para sa pamilya? Igwa daw kamo nin nakapakokosog sa espirituwal na orolay kaiba kan saindong mga aki, na pinag-oolayan an positibong mga bagay manongod sa katotoohan asin sa kongregasyon? Gustong-gusto daw nindo na mag-atender sa gabos na pagtiripon asin makikabtang sa paglilingkod sa langtad bilang sarong pamilya?
4 Mga magurang, horophoropa nindo an halimbawa na ipinaheheling nindo sa saindong mga aki. Pakarhayon iyan na marhay, asin iingatan ninda iyan sa bilog nindang buhay. An agom nin sarong nagbibiaheng paraataman, na ngonyan labing 70 anyos na, nagsabi: “Ako nakikinabang sagkod ngonyan sa marahay na halimbawa kan sakong mamomoton na Kristianong mga magurang. Asin odok an sakong pamibi na mapatunayan ko an sakong lubos na pag-apresyar sa pamanang ini paagi sa paggamit dian nin tama sagkod sa maarabot pang panahon.”