Ano an Sasabihon Nindo sa Sarong Muslim?
1 Nakaeksperyensia na daw kamong makapagpatotoo sa sarong Muslim? Kun iyo, posibleng naaraman nindo na an mga Muslim may odok na pagtubod sa Dios. Minsan siring, kadikit an aram ninda manongod sa maabot na Paraiso sa daga siring kan ihinula kan mga propeta ni Jehova, asin boot niatong ihiras an paglaom na iyan sa sainda. (1 Tim. 2:3, 4) An minasunod na impormasyon siertong makatatabang sa saindo na makatao nin marahay na patotoo.
2 An mga Muslim nagtutubod ki Ala, o sa Dios, asin sinda naniniwala na si Muḥammad an propeta nin Dios. An saindang banal na libro iyo an Koran, asin an saindang relihion inaapod na Islam, na nangangahulogan nin “pagpasakop.” Nagsasabi an Koran na sala an pagputik asin pagsamba sa mga idolo, na an Dios saro sana, asin na sia bakong kabtang nin sarong Trinidad. Siring man, itinotokdo kaiyan an inmortalidad kan kalag, kalayo sa impierno, asin langitnon na paraiso. Inaako kan mga Muslim an Biblia bilang Tataramon nin Dios alagad ta naniniwala na iyan naliwat, mientras na an Koran, na nasa orihinal pang lenguahe kaiyan, napagdanay na dalisay.
3 Magin Makikatood, Mataktika, Asin Mapagmansay: Kun nakikipag-olay sa sarong Muslim, magin makikatood asin mataktika. (Tal. 25:15) Girumdomon na an mga paniniwala nin Muslim marigon na nakatadom asin na an kadaklan kaiyan nanodan paagi sa pagtuom. Sa siring, an pangangatanosan manongod sa relihiosong mga katokdoan asin an pagpapatunay sa sainda kun ano an kabotan nin Dios dai nagin kabtang kan saindang espirituwal na pagtalubo. (Roma 12:2) Tangani na matabangan an mga Muslim, mahalagang marhay an pasensia asin pagsabot.—1 Cor. 9:19-23.
4 Likayan an paggamit nin mga pananaram na maisip an sarong Muslim na konektado kamo sa Kakristianohan. Liwanagon na kamo bakong kabtang magsala nin Katoliko o Protestanteng relihion, na kamo napapalaen. Sambiton na an Biblia Libro nin Dios. Huling an mga Muslim habo sa terminong “Aki nin Dios,” sa parate pinakamarahay na dai iyan gamiton o ipakipag-olay an temang ini sagkod na may nagibo nang pag-oswag sa espirituwal. Minsan siring, puede kamong makipag-olay dapit ki Jesus, na inaapod siang sarong propeta o mensahero. Likayan an pakikiargumento. Kun naoobserbaran nindo na sia naaanggot na, magalang na humale kamo tolos-tolos.
5 Pinakamarahay na makipag-olay sa saro sanang tawo asin bakong sa sarong grupo. Sa parate, marahay na an mga babae magpatotoo sa mga babae, asin an mga lalaki, sa mga lalaki. Siempre pa, may mga eksepsion digdi, alagad maninigong gamiton an marahay na paghusgar. Siring man, dakol na Muslim an sensitibo manongod sa ibinibilang ninda na bakong mabining gubing asin pag-alinyar nin mga babae. Kaipuhan na aram ini kan mga tugang na babae.—1 Cor. 10:31-33.
6 Mga Bagay na Mapag-oolayan: Magtaram nin prangka dapit sa kadakulaan nin Dios asin sa saiyang pagkamoot. Dai mag-alangan na sabihon na kamo tunay na nagtutubod, na an Dios saro sana (bakong sarong Trinidad), asin na sala an pagsamba sa idolo. Magtaram manongod sa karatan sa kinaban ngonyan—an mga guerra, sibil na kariribokan, pagkaongis sa rasa, asin an pagsaginsagin na risang-risa sa tahaw nin kadakol na tawong relihioso.
7 An brosyur na The Guidance of God—Our Way to Paradise magtatao saindo nin dugang pang pakarorop sa mga topiko na puedeng gamiton sa pagbukas nin mga pakikipag-olay sa mga Muslim. Iyan dinisenyo tangani na maakit an mga Muslim na nag-iistar sa mga kamugtakan na tibaad iniisip ninda na talingkas na mag-adal kan Biblia. May limitado kaming suplay sa sangang opisina asin halaton nindo an dakol pang maabot sa dai mahahaloy.
8 Bilang sarong pag-atubang, puede nindong sabihon:
◼ “May ginigibo akong espesyal na paghihingoa na makaolay an mga Muslim. Haloy na akong nagbabasa manongod sa saindong relihion asin naniniwala na tama ako sa pagsabi na an mga Muslim nagtutubod sa sarong tunay na Dios asin sa gabos na propeta. [Pasimbagon.] Boot kong makipag-olay sa saindo dapit sa sarong suanoy na hula na nagsasabing gigibohon an daga na magin sarong paraiso. Puede daw na basahon ko sa saindo an isinurat kan propeta? [Basahon an Isaias 11:6-9.] An hulang ini ipinagigirumdom sa sako an sarong kotasyon sa Koran na makukua sa brosyur na ini.” Buksan sa pahina 9 kan brosyur na Guidance of God, asin basahon an kotasyon na nasa mas maitom na letra, na nanonongod sa mga matanos na magmamana kan daga. Kun magpaheling nin interes, ipadagos an pakikipag-olay paagi sa pagpaliwanag kan parapo 7 sagkod 9 na nasa ibong na pahina. Iwalat an brosyur, asin iareglo an pagdalaw liwat.
9 Kun inaagda an saro na estudyaran an brosyur na Guidance of God, pinakamarahay na apodon iyan na pag-orolay, bakong pag-adal sa Biblia. Kun matapos na nindo an brosyur, siertong magigin andam na an inaadalan sa pag-adal kan brosyur na Kahagadan o kan librong Kaaraman. An ibang publikasyon na espesyalmenteng dinisenyo para sa mga Muslim iyo an tract na How to Find the Road to Paradise asin an pulyetong The Time for True Submission to God.
10 Paagi sa kaaraman na ini manongod sa mga paniniwala asin pagigin sensitibo nin Islam, kita magigin mapagmansay sa satong pagpili nin babasahon na iinaalok niato sa mga Muslim asin sa paagi na kita nagpapatotoo sa sainda. Padagos logod na bendisyonan ni Jehova an satong mga paghihingoa na tabangan an gabos na klase nin tawo na umapod sa ngaran nia asin maligtas.—Gibo 2:21.