Pag-adal kan Daniel’s Prophecy
1 Poon sa semana nin Abril 17, pag-aadalan niato an Pay Attention to Daniel’s Prophecy! sa mga Pag-adal sa Libro kan Kongregasyon. Dakol an nakabasa na kan kawiliwiling librong ini, alagad ngonyan may oportunidad kitang kamtan an mga pakinabang na minagikan sa grupong pag-orolay sa materyal. An gabos na parahayag, interesado, asin aki iniimbitaran, ineenkaminar nanggad, na magin presente kada semana para sa kompletong pag-adal na ini kan libro sa Biblia na Daniel.—Deut. 31:12, 13.
2 Iskedyul sa Pag-adal Asin mga Instruksion: An kompletong iskedyul sa pag-adal sa librong Daniel’s Prophecy yaon sa luwas na ini kan An Satong Ministeryo sa Kahadean. Seguradohon na magkaigwa nin kopya kaiba kan saindong librong pag-aadalan. Ipinaheheling kan iskedyul an kapitulo asin mga parapo sa libro siring man an mga bersikulo sa Daniel na pag-oolayan sa sesyon kada semana. Ipinaliliwanag kan mga nota sa ibaba kun paano asin kun noarin eestudyaran an nagkapirang materyal na nasa libro. Sa pagtatapos kan kada semanal na pag-adal, ineenkaminar an namamayo na repasohon kaiba kan grupo an espesipikong mga bersikulo sa Daniel na nalilista sa iskedyul para sa semanang iyan. Kun itinotogot nin panahon, puedeng basahon asin komentohan an mga bersikulo. May mga bersikulo na madodoble sa duwang semana huli sa nagpapadagos na pag-estudyar kan aplikasyon kaiyan.
3 Mag-andam Para sa Kompletong Pag-adal: Ginibo an paghihingoa na tawan nin supisyenteng panahon kada semana an dai hinihidaleng pag-orolay kan asignadong materyal. Medyo halipot an apat na leksion. Huli kaini, sa pagtatapos kan pag-adal para sa semana nin Hunyo 5, puedeng iiba kan namamayo an pagrepaso sa Daniel 2:1-40. Para sa semana nin Hunyo 26, puede niang repasohon an Daniel 3:1-30. An semana nin Setyembre 4 maninigong kaiba an detalyadong pag-orolay sa mga ilustrasyon asin teksto na nasa pahina 139. An tsart na nasa pahina 188 asin 189 maninigong pag-olayan sa pag-adal para sa semana nin Oktubre 2.
4 Mag-andam nin marhay para sa pag-adal kada semana, asin maogmang magpartisipar dian. Pahalagahan an saindong pribilehio na makiasosyar sa naheheling na organisasyon ni Jehova asin makinabang sa pakarorop asin pakasabot na itinatao kan saiyang fiel na mga linahidan. (Dan. 12:3, 4) Maboot na enkaminaron an iba na umatender nin regular sa pag-adal sa libro. Kita logod gabos magtao nin atension sa makahulang tataramon nin Dios na ihinayag sa nakapupukaw nin hararom na paggalang na librong Daniel.—Heb. 10:23-25; 2 Ped. 1:19.