Seguradohon na Kamo Bumalik!
1 “Magayonon si orolay mi! Dapat kong girumdomon na dumalaw liwat duman.” Nasabi na daw nindo an mga tataramon na iyan asin sa huri nalingawan kun saen nag-iistar an tawong iyan? Kun iyo, aram nindo na an solamenteng paagi na masesegurado nindong makababalik liwat kamo iyo na isurat iyan.
2 Isurat Iyan Gabos: Mientras na presko pa sa saindong isip an pakikipag-olay sa sarong interesado, pumondo nin kadikit tangani na isurat an gabos na pertinenteng impormasyon manongod sa pagsongko. Isurat an ngaran nia asin kun paano nindo sia mamimidbid. Isurat an saiyang adres, alagad dai iyan pagtoodan—maghapot tangani na masegurado na tama an isinurat nindo. Isurat an tema na pinag-olayan nindo, an ano man na mga tekstong binasa nindo, asin kun anong babasahon an ikinapasakamot.
3 Kun nagwalat kamo sa tawong iyan nin sarong hapot na sisimbagon sa masunod na pagsongko, isurat iyan. May naaraman daw kamo dapit sa tawong iyan, sa saiyang pamilya, o sa saiyang relihion? Kun igwa, isurat ini. Dangan sa sunod nindong pagsongko, an pagsambit nindo kaiyan magpapaheling kan saindong personal na interes sa indibiduwal na iyan. Sa katapustapusi, iiba an aldaw asin oras na enot kamong nagsongko asin kun noarin nindo sinabi na kamo madalaw liwat. Paagi sa pagkaigwa nin tamang mga nota, magkakaigwa kamo nin malinaw na mga pagirumdom asin kadikit an posibilidad na malingawan an saindong panuga na madalaw liwat.—1 Tim. 1:12.
4 Oras na kompleto na an saindong rekord, ibugtak iyan kaiba kan iba pang kasangkapan nindo sa paglilingkod sa langtad—bag, Biblia, librong Reasoning, asin babasahon—tangani na iyan pirmeng kombenyenteng gamiton. Marahay na irekord an mga mayo sa harong sa house-to-house record na siblag duman sa mga ginagamit nindo sa pagsurat kan saindong mga pagdalaw liwat. Siempre, ano man an paghihingoa nindong irekord an mga pagdalaw liwat, an mahalaga iyo na seguradohon na kamo bumalik!
5 Isip-isipa an Tawong Iyan: Kun nagpepreparar para sa ministeryo, repasohon an saindong mga nota nin pagdalaw liwat. Isip-isipon an balang indibiduwal asin kun anong pagdolok an tibaad pinakamarahay na gamiton sa masunod na pagsongko. Isipon kun paano patataluboon an interes kan tawong iyan pasiring sa pag-adal sa Biblia. An siring na pagplano puedeng makadugang sa saindong pagigin mabunga bilang ministro kan maogmang bareta asin, huli kaini, sa saindong personal na kagayagayahan.—Tal. 21:5a.
6 Kaya sa masunod na makanompong kamo nin talingang naghihinanyog, dai mangatanosan na magigirumdoman tolos nindo an pagsongko. Imbes, isurat iyan, repasohon an saindong mga nota, padagos na isip-isipon an tawong iyan, dangan seguradohon na kamo bumalik!