Abril—Panahon na Magin Maigot sa Marahay na mga Gibo!
1 Mantang nagrarani an bagyo sa sarong matawong lugar, nagigin apretado an pangangaipo na patanidan an mga tawo manongod sa nagdadangadang na peligro. Mantang orog na nagrarani an bagyo, dapat man na orog na idoon an mga patanid. Taano? Huli ta buhay an nakataya! May mga tawo na tibaad dai nakadangog kan nakaaging mga patanid. An iba tibaad nakadangog alagad nagpabaya na humiro. Totoo man iyan sa patanid nin Dios na isinugo sa sato na ibalangibog bago paraon “kan alihoshos” kan matanos na kaanggotan nin Dios an gabos na tada kan maraot na kinaban na ini. (Tal. 10:25) Nakataya an daing sagkod na buhay nin binilyon na tawo! Kaipuhan na ibalangibog an patanid. Kaipuhan na kita magin “maigot sa marahay na mga gibo.”—Tito 2:11-14.
2 Sa laog nin dakol na dekada, an banwaan ni Jehova namotibar na gibohon an panahon kan Memorial na mani panahon para sa espesyal na kaigotan sa ministeryo. Kan tigsoli kan 1939, an Informant, an sinundan kan An Satong Ministeryo sa Kahadean, itinao an pagparigon sa boot na ini: “Huli sa nagdadangadang na tigsoli, asin marahay na kamugtakan nin panahon, maninigo niatong asahan na dodoblehon kan mga parahayag [sa kongregasyon] an mga oras sa langtad, asin madudugangan nin dakula an oras kan mga payunir. An Abril bulan na may limang Domingo. Igwa man iyan nin limang Sabado. Gibohon an lambang Sabado asin Domingo durante kan Abril . . . na mani panahon nin espesyal na paghuhulit.” Iyan nakapupukaw sa isip na pasohan na itinao para sa mga tugang 60 taon na an nakaagi! Ngonyan na taon, siring man sana kan 1939, an bulan nin Abril may limang Sabado asin Domingo. Ano an mga plano nindo sa bulan na ini? Ano an mga isinurat nindo sa saindong kalendaryo ngonyan na Abril 2000? Planohon na magkaigwa nin makahulogan na pakikikabtang sa marahay na mga gibo kaiba kan iba pa sa banwaan ni Jehova durante kan espesyal na bulan na ini nin pinarikas na espirituwal na aktibidad.
3 Kun Ano an Inaasahan Niatong Magibo: An pinakaimportanteng aldaw kan taon 2000 natangod sa bulan na ini. Iyan an Abril 19, an anibersaryo kan pagkagadan ni Jesus. Gumibo kita nin espesyal na paghihingoa na imbitaran an pinakadakol na tawong mapupuede sa Memorial. Siring kan isinuherir kan nakaaging bulan, gumibo nin lista nin gabos na potensial na maatender sa Memorial asin siertohon na mayo nin malaktawan. Maninigong kabale sa mga imbitado an siisay man na inaktibong mga parahayag, inaadalan sa Biblia, dinadalaw liwat, idtong mga dating inaadalan, kaibaiba sa trabaho, kaeskuela, kataed, paryente, asin iba pang kamidbid. May malulunadan daw an mga gustong umatender? Kun mayo, puede daw kamong tumabang sa mamomoton na paagi? Sa banggi kan Memorial, kita gabos magkakaigwa nin pribilehio na ipamate sa mga nag-aatender na sinda maogmang inaako. Pakatapos kan Memorial, puede niatong ipagpadagos an dugang pang espirituwal na tabang sa siring na mga interesado.
4 An pagigin “maigot sa marahay na mga gibo” durante kan mga aldaw bago asin pakatapos kan Memorial sarong marahay na paagi na ikapaheling ki Jehova na talagang pinahahalagahan niato an gabos na ginibo nia para sa sato. An mas halawig na oras sa aldaw asin mas marahay na kamugtakan nin panahon sa kadaklan na lugar magpapangyari sa dakol sa sato na dugangan an satong mga paghihingoa sa pag-ebanghelyo. Kun kamo nag-o-auxiliary payunir, bobooton nindong gibohon an pinakamakakaya nindo na gumamit nin 50 oras o labi pa sa ministeryo. (Mat. 5:37) Sunodon nin estrikto an iskedyul na ginibo nindo sa kapinonan kan bulan. (Ecl. 3:1; 1 Cor. 14:40) Gibohon logod kan iba pa sa sato an pinakamakakaya niato na suportaran an gabos na payunir, paagi sa pagparigon sa boot ninda sagkod paagi sa pag-iba sa sainda sa langtad. (Ikomparar an 2 Hade 10:15, 16.) Kun maigot kita na magsasabwag ngonyan na Abril, maaasahan niato an dakulang kagayagayahan asin bendisyon hale ki Jehova. (Mal. 3:10) Tibaad magserbi ining sarong tangga pasiring sa dagos-dagos na pag-auxiliary payunir o pagregular payunir. Logod na an espirituwal na puersa nin paghiro na pinonan niato ngonyan na Abril magpadagos sagkod sa masunod na mga bulan mantang kita nagpapadagos bilang regular na mga parahayag kan Kahadean.
5 Daing duda na rinibo sa banwaan ni Jehova ngonyan na bulan an mapoon nin dakol pang pag-adal sa Biblia. Boot daw nindong makapoon nin saro? Espesipikong ipamibi na magkaigwa nin inaadalan, asin maghingoa kaoyon kan saindong mga pamibi. Makasesegurado kamo na pahahalagahan ni Jehova an saindong mapakumbabang mga kahagadan na tabangan na makakua nin tawo na sadiosan an puso na totokdoan.—1 Juan 3:22.
6 Uya an probado na sa langtad na pagdolok na epektibo nang ginamit sa pagpoon nin mga pakikipag-olay. Magpoon kamo paagi sa pagsabing: “Sa paghona daw nindo an gabos na kadahasan sa pampublikong mga eskuelahan bunga nin sa demonyong aktibidad, o iyan daw dahelan sa kadaihan nin pagsasanay nin mga magurang?” Pasimbagon. Kun magsabi an saro na “sa demonyong aktibidad,” basahon an Kapahayagan 12:9, 12, asin itampok an papel kan Diablo sa pagpalakop nin grabeng kariribokan sa kinaban. Dangan buksan an brosyur na Kahagadan sa leksion 4, asin hapoton kun napag-isip-isip na nia kun saen gikan an Diablo. Ipadagos an pagbasa asin ipakipag-olay an enot na duwang parapo. Kun pilion nia an “kadaihan nin pagsasanay nin mga magurang” na iyo an dahelan sa kadahasan sa mga eskuelahan, basahon an 2 Timoteo 3:1-3 asin sabihon an mga ugale na malinaw na nakakokontribwir sa problemang ini. Dangan buksan an brosyur na Kahagadan sa leksion 8, basahon an parapo 5, asin ipadagos an pag-orolay. Kun makagigibo kamo nin areglo na dumalaw liwat, posibleng marhay na pasiring na kamo sa pagkaigwa nin regular na pag-adal sa Biblia sa tawong iyan. Sa masunod na pagdalaw, hapoton sia kun may aram siang iba pa na tibaad interesadong madangog an saiyang nanonodan.
7 An saro pang paagi na magin “maigot sa marahay na mga gibo” durante kaining Abril iyo na makikabtang sa manlaenlaen na kabtang nin paghuhulit. Napag-isip-isip na daw nindong maghulit sa sarong parke o sa sarong paradahan? Sa sarong pondohan nin auto o sa sarong estasyon nin tren? O boot daw nindong probaran na maghulit paagi sa telepono, sa tinampo, sa komersial na teritoryo? Taano ta dai isagibo an mga ideyang iyan ngonyan na bulan? Tatabangan kamo ni Jehova na magkaigwa kan kinakaipuhan na pagkapusoan. (Gibo 4:31; 1 Tes. 2:2b) Tibaad puede kamong makiareglo na maghulit kaiba nin sarong payunir o parahayag na eksperyensiado sa mga kabtang na ini kan ministeryo.
8 An siisay man na nagmamawot na dugangan an saiyang kabtang sa paghuhulit bobooton na makikabtang sa impormal na paghuhulit. Sa parate an kaipuhan sana iyo an makikatood na pakikipag-olay sa sarong tawo. Magpalataw sana nin sarong tema na komun na pinagkakainteresan, na puedeng ginagamit an pagdolok na itinampok sa parapo 6. Pagmaigotan na gamiton na marhay an dawa saradit na kabtang kan oras na mawawara kutana. Dai niato iinaapon an mga singko sentabos, dies sentabos, o beinte-singko sentabos huli sana ta iyan bakong bilog na mga piso. Taano ta dai kapakipakinabang na gumamit nin dawa limang minuto, sampulong minuto, o kinse minuto kan sarong oras sa impormal na paghuhulit?
9 Sarong Panahon Para sa Paghorophorop: Girumdomon an mapuersang mga punto na itinao sa drama sa dai pa sana nahahaloy na “Makahulang Tataramon nin Dios” na Pandistritong Kombension. An drama, na may temang Pagpahalaga sa Satong Espirituwal na Mana, pinapag-isip kita nin maingat dapit sa pagkakalaen ni Jacob asin Esau. Nagsabi si Esau na arog ki Jacob interesado man sia sa espirituwal na mga bagay, alagad dai iyan ipinaheling kan mga gibo ni Esau. (Gen. 25:29-34) Kanigoan kapuersang patanid para sa sato! Siring ki Jacob, magin andam kita na makipagtusayan, makigumolan pa ngani, para sa bendisyon ni Jehova. (Gen. 32:24-29) Taano ta dai gamiton an Abril asin an gabos na masunod na bulan na pakosogon giraray an satong kaigotan, na nungkang ipinasisipara na sana an satong marahayon na espirituwal na mana?
10 “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” (Sof. 1:14) Kaipuhan na ibalangibog an maogmang bareta kan Kahadean. Buhay an nakataya! An bulan na ini magin logod espesyalmenteng maogma para sa bilog na banwaan ni Jehova mantang sararo niatong ipinaheheling na kita “maigot sa marahay na mga gibo.”
[Kahon sa pahina 4]
Mga Pagirumdom sa Memorial
An selebrasyon kan Memorial ngonyan na taon natangod sa Mierkoles, Abril 19. Maninigong tawan nin atension kan kamagurangan an minasunod na mga bagay:
◼ Sa pag-iskedyul kan oras para sa pagtiripon, siertohon na an mga emblema dai ililibot sagkod na dai pa minasolnop an saldang.
◼ An gabos, kabale an espiker, maninigong paisihon manongod sa eksaktong oras asin lugar kan selebrasyon.
◼ Maninigong magkaigwa asin mag-andam nin tamang klase nin tinapay asin arak.—Helingon an Setyembre 1, 1985 Torrengbantayan, pahina 12 (w85-E 2/15, p. 19).
◼ An mga plato, kopa, asin angay na lamesa patin mantel maninigong darahon na sa tiriponan asin areglaron na nin patienot.
◼ Maninigong linigan na marhay nin patienot an Kingdom Hall o ibang lugar na tiriponan.
◼ An mga attendant asin serbidor maninigong pilion asin tawan nin instruksion nin patienot manongod sa saindang mga obligasyon asin sa tamang prosedimiento.
◼ Maninigong gibohon an mga areglo na serbihan an siisay man sa linahidan na may helang asin dai kayang magin presente.
◼ Kun labi sa sarong kongregasyon an nakaiskedyul na magamit kan sasarong Kingdom Hall, maninigong magkaigwa nin marahay na koordinasyon an mga kongregasyon tangani na malikayan an dai kinakaipuhan na pagsurusuan sa sala paglaog o entrada, sa pampublikong mga dalan-dalan, asin sa paradahan.