Papagdanayon an Marahay na Gawe-gawe na Nagpapamuraway sa Dios
1 Saen man kita, an satong gawe-gawe, gubing, asin pag-alinyar nagpapatotoo manongod sa sato asin sa Dios na satong sinasamba. Ini nagigin nangorognang risang-risa sa darakulang katiriponan kan banwaan nin Dios, kun saen dakol na tawo an nagmamasid sa sato. Kun kita arogan, napamumuraway an ngaran ni Jehova. (1 Ped. 2:12) Minsan siring, an bakong marahay na ugale o daing konsiderasyon na mga hiro nin pipira sana puedeng magtao nin katuyawan sa ngaran nin Dios asin sa saiyang banwaan. (Ecl. 9:18b) An paggirumdom na paagi sa satong gawe-gawe hinuhusgaran kan mga taga luwas an satong organisasyon asin an Dios na satong sinasamba maninigong magpangyari sa sato na magin maingat dapit sa ‘paggibo kan gabos na bagay sa ikamumuraway nin Dios.’—1 Cor. 10:31.
2 Tamang Ugale sa Kombension: Ano man na klase nin pasilidad an ginagamit, iyan dapat na mansayon na sarong dakulang Kingdom Hall durante kan kombension. An angay na gubing asin pag-alinyar maninigong magin risang-risa siring man sana kun kita nag-aatender sa mga pagtiripon kan satong lokal na kongregasyon. Pareho durante asin pakatapos kan mga sesyon sa kombension, maninigong likayan kan mga tugang na lalaki asin babae an pagsulot nin bakong mabini o sobrang sunod sa uso na gubing, na nagpapabanaag kan espiritu kan kinaban asin ginigibo kitang depisil nang mamidbid na may marahay na kalaenan. Maninigo na magin maingat an mga tugang na babae na an estilo asin laba kan saindang palda patin gubing igwa nin angay na kabinian. (1 Tim. 2:9, 10) Baga man nag-aatender sa kombension, nagdadagos sa hotel, nagkakakan sa restawran, o namamakal sa tindahan, maninigong ipabanaag niato sa gabos na panahon na kita mga ministro nin Dios, na dai nagtatao nin dahelan nin pagkasingkog.—2 Cor. 6:3.
3 An bautismo gigibohon sa Sabadong aga sa kombension. An Torrengbantayan na Abril 1, 1995, pahina 30, ilinaladawan an aktitud na maninigo niatong ipaheling sa okasyon na iyan. Iyan nagsasabi na “dapat [niato] na mansayon an bautismo na may angay na pagkaseryoso. Bako iyan an panahon para sa emosyonal na mga pagkurahaw, para sa pagparti, o para sa maribok na kaorogmahan. Alagad iyan bako man na sarong mamondo o mapungaw na panahon.” Bakong tama nanggad para sa mga mapabautismo na magsulot nin garo kinulang na marhay nin tela o mahimpison na mga gubing na pankarigos, baga man mga lalaki o babae. Huli kaini, an gabos maninigong magpabanaag pareho kan pagigin seryoso asin kan kagayagayahan nin Kristianong bautismo.
4 Magbalon nin Sadiring Kakanon sa Kombension: Nakikiolay an Sosyedad na kita gabos magdara nin sadiring pangodtohan kada aldaw sa kombension. Sinunod kan kadaklan na tugang an instruksion na ini asin nanompongan ninda na sa pahingalo sa odto, nakakataed ninda an saindang pamilya asin nakakakakan kan balon ninda para sa aldaw na iyan. Dakol an nagsabi na nakagagayagaya an oportunidad na magpahorohayahay durante kan pahingalo sa odto asin magkaigwa nin dugang na panahon na makaibanan an saindang mga tugang. An sarong dahelan sa pag-otro kan instruksion na ini iyo na nariparo niamo na an nagkapirang tugang minahale sa auditoryum tangani na bumakal nin kakanon sa mga nagtitinda sa tinampo asin sa kaharaning mga restawran. Kun an gabos na tugang maghihingoa na magbalon nin sadiring pangodtohan imbes na magbakal sa mga nagtitinda sa luwas, madedesganar an mga nagtitinda na ini na magtiripon sa mga laogan pasiring sa pasilidad kan kombension, na nagigin dahelan nin pagsurusuan asin makanos helingon.
5 Bakong Panahon Para sa Komersial na mga Aktibidad: Mantang an lugar nin kombension nagigin sarong dakulang Kingdom Hall sa laog nin tolong aldaw, mayong komersial na aktibidad an maninigong gibohon nin siisay man sa mga nag-aatender. Sala para sa siisay man na tugang na aprobetsaran an kombension tangani na magpalakop kan saiyang mga aktibidad sa negosyo, o magpabakal nin mga bagay, arog baga nin mga patos sa libro o T-shirt, abaniko, o kalendaryo na may nakaimprenta dian na ngaran kan kombension.
6 Pagpapadanay na Malinig an Lugar kan Kombension: Kun iaapon kan lambang tugang an saiyang basura sa tamang mga lalagan o darahon iyan sa harong, papapasilon kaini na papagdanayon na malinig an pasilidad kan kombension. Kun may nariparo kamong papel na iinapon sa natad, magin listo na puroton iyan. Maninigong sanayon kan mga magurang an saindang mga aki na dai mag-apon nin basura sa salog alagad iapon iyan sa tamang paagi. Kun kaya nindong magboluntaryo sa dikit na panahon sa paglinig kan pasilidad pakatapos kan mga sesyon aroaldaw, ini aapresyaron na marhay.
7 Pinagigirumdom kita ni Pedro manongod sa ‘maninigong magin anong klaseng mga tawo kita sa banal na mga gawe asin gibo nin diosnon na debosyon.’ (2 Ped. 3:11) An sato logod na mga tataramon asin gawe-gawe sa “Mga Paraotob kan Tataramon nin Dios” na Pandistritong Kombension makatabang sa mga sadiosan an pusong nagmamasid na mamidbid asin sumamba sa satong dakulang Dios, na angay sa gabos na onra asin kamurawayan.—1 Cor. 14:24, 25.