‘Makipaglaban kan Marahay na Pakilaban kan Pagtubod’
1 Sinadol ni apostol Pablo si Timoteo na ‘makipaglaban kan marahay na pakilaban kan pagtubod.’ (1 Tim. 6:12) Si Pablo mismo guminawe sono sa mga tataramon na iyan. Sa huring kabtang kan saiyang buhay, sia nagtaram na may kasiertohan na sia personalmenteng nakipaglaban nin marahay na pakilaban. (2 Tim. 4:6-8) Sa gabos na paagi, ipinadagos nia an ministeryo na may pagkapusoan, kosog nin boot, asin pakatagal. Paagi sa pag-arog sa saiyang halimbawa, puede kitang magkaigwa nin kaparehong panlaog na kasiertohan na ginigibo niato an pinakamakakaya niato sa satong pakikilaban para sa Kristianong pagtubod.
2 Gamiton an Paghihingoang Kaipuhan: Si Pablo nagmaigot na marhay sa ministeryo. (1 Cor. 15:10) Iyo man kita mantang hinahanap niato sa satong teritoryo an gabos na maninigo. (Mat. 10:11) Tangani na maabotan an nagkapira sa sainda, iyan tibaad mangahulogan nin pagbangon nin amay tangani na magpatotoo sa mga nanonompongan niato sa tinampo. O iyan puedeng mangahulogan nin paghuhulit kun pabanggi na o sa amay na banggi tangani na manuparan an mga tawo pakapuli ninda sa saindang mga harong.
3 Kaipuhan an disiplina sa sadiri asin marahay na pag-iskedyul tangani na magin nasa oras sa tagboan kan satong grupo nin pag-adal sa libro bago lumuwas sa paglilingkod sa langtad. Halimbawa, an nagkapirang miembro kan pamilyang Bethel kaipuhan na magbiahe nin sarong oras o labi pa paduman o pabalik tangani na makikabtang sa ministeryo kaiba kan asignadong mga kongregasyon ninda sa mga katapusan kan semana. Siring man, puedeng hanga kita sa nagkapirang parahayag asin pamilya sa satong kongregasyon na nagbibiahe nin medyo harayo alagad nasa oras. An siring na mga halimbawa nin kahigosan asin personal na pag-organisar angay na arogon.
4 Maninigo kitang mamotibar na kultibaron an gabos na interesado na nanonompongan niato. Dawa kun nagpapasakamot nin mga babasahon sa tinampo o sa impormal na mga kamugtakan, kaipuhan kitang maghingoa na kuanon an adres o telepono kan indibiduwal. Dangan puede niatong songkoon sia tangani na pataluboon an interes asin pagmaigotan na makapoon nin pag-adal sa Biblia.
5 Magin Regular sa Paglilingkod: Si Pablo dagos-dagos asin lubos sa paghuhulit. (Roma 15:19) Kumusta man kamo? Kamo daw regular na nakikikabtang sa ministeryo? Nakikabtang na daw kamo sa paglilingkod sa langtad ngonyan na bulan? Interesado an mga namamayo sa Pag-adal sa Libro kan Kongregasyon na maheling na an gabos sa saindang grupo nakikikabtang sa ministeryo ngonyan na Agosto. Tatabangan ninda kamong gibohon iyan.
6 Paagi sa pag-arog sa halimbawa ni Pablo sa lubos na pagsuportar kan maogmang bareta, makapagpapadagos kitang ‘makipaglaban kan marahay na pakilaban kan pagtubod.’