“Sa Dios an Gabos na Bagay Posible”
1 An pangenot na gibohon kan Kristianong kongregasyon ihulit an mensahe kan Kahadean sa bilog na kinaban. (Mat. 24:14) Iyan sarong dakulaon na gibohon. Para sa dakol na nagmamasid, garo baga iyan nagkakaipo nin rekurso na labi pa sa kun ano an yaon sa sato. Para sa iba, an pag-otob kan asignasyon na ini haros dai maisip huli ta kita pinagtutuya, tinutumang, asin pinaglalamag. (Mat. 24:9; 2 Tim. 3:12) Kombensido an mga mapagduda na an gibohon na ini bagay na imposibleng mahaman. Minsan siring, si Jesus nagsabi: “Sa Dios an gabos na bagay posible.”—Mat. 19:26.
2 Positibong mga Halimbawa na Dapat Arogon: Pinonan ni Jesus an saiyang ministeryo bilang sarong tawo na tumang sa bilog na kinaban. Sa pagprobar na olangon sia na magin mapanggana, ginibo sa saiya kan mga nagkokontra an gabos na maiisip na insulto, na sa katapustapusi pinaagi sia sa makologon na kagadanan. Pero, sa katapusan, kompiadong ipinahayag ni Jesus: “Nadaog ko an kinaban.” (Juan 16:33) Totoo nanggad na gibong masakit paniwalaan!
3 Ipinaheling kan mga disipulo ni Jesus an kaparehong makosog an boot na aktitud asin kaigotan sa Kristianong ministeryo. Dakol an hinampak, binugbog, ibinilanggo, asin ginadan pa ngani. Pero, sinda “naggagayagaya huli ta pinapagkanigo sinda na magtios nin kasopganan huli sa saiyang ngaran.” (Gibo 5:41) Sa ibong nin mga pagkontra sainda, nahaman ninda an garo baga imposibleng ipinagigibo na paghuhulit kan maogmang bareta “sagkod sa kaporoporohi kan daga.”—Gibo 1:8; Col. 1:23.
4 Kun Paano Magigin Mapanggana sa Satong Kaaldawan: Kita man maigot na naghuhulit kan Kahadean sa ibong nin garo baga imposibleng mga pagkontra. Sa ibong nin mga pagprohibir, paglamag, pagbilanggo, asin iba pang madahas na mga pagprobar na paontokon kita, kita nagigin mapanggana. Paano ini nagin posible? “‘Bakong paagi sa puersa militar, ni sa kapangyarihan, kundi paagi sa sakong espiritu,’ nagsabi si Jehova nin mga hukbo.” (Zac. 4:6) Paagi sa suporta ni Jehova sa sato, mayo nin ano man na makapaoontok sa satong gibohon!—Roma 8:31.
5 Kun kita naghuhulit, mayo kita nin dahelan na masopog o matakot o makamate nin kakulangan nin kakayahan. (2 Cor. 2:16, 17) Igwa kita nin nakalalabing marhay na mga dahelan na magpadagos sa pagpalakop kan maogmang bareta kan Kahadean. Sa tabang ni Jehova, mahahaman niato an “imposible”!—Luc. 18:27.