Hapot

◼ Noarin angay na mag-organisar nin dagdag na grupo nin Pag-adal sa Libro kan Kongregasyon?

An pag-organisar nin sarong bagong grupo maninigong estudyaran kun kinakaipuhan tanganing mapagdanay an kabilangan nin mga nag-aatender na mga 15 o mas dikit pa sa lambang lugar kan pag-adal sa libro, kaiba an Kingdom Hall. Taano ta irinerekomendar ini?

Kun pinagdadanay na sadit an mga grupo nin Pag-adal sa Libro kan Kongregasyon, orog na natatawan nin atension kan namamayo an lambang saro na nag-aatender. Saro pa, may bastanteng oportunidad an gabos na magkomento sa sarong kamugtakan na nakatatabang sa pagpahayag sa publiko kan saindang pagtubod. (Heb. 10:23; 13:15) An pagkaigwa nin mas saradit na grupo sa nagkapirang lugar sa bilog na teritoryo kan kongregasyon ginigibong mas kombenyente an pag-atender sa Pag-adal sa Libro kan Kongregasyon asin sa mga pagtiripon bago lumuwas sa paglilingkod sa langtad. Nadiskobre kan mga kongregasyon na dinagdagan an mga lugar nin pag-adal na nadagdagan man an pinag-iribang kabilangan nin mga nag-aatender sa pag-adal sa libro.

Tibaad may espesyal na mga kamugtakan na kun saen mas marahay na mag-organisar nin saro pang grupo, dawa ngani iyan medyo sadit. Tibaad totoo ini sa sarong napapasuway na lugar o kun saen an mga lugar nin pag-adal sa presente surusuan na o kulang nin bastanteng tukawan. Kun kaipuhan, puedeng mag-organisar nin sarong grupo na magtitiripon kun aldaw para sa kapakinabangan kan mga may edad na, nagtatrabaho sa banggi, o mga tugang na babae na bakong Saksi an agom.

An lambang grupo nin pag-adal sa libro maninigong magkaigwa nin nagkapirang asignadong parahayag na makosog sa espirituwal asin aktibo siring man nin sarong kualipikadong namamayo asin parabasa. An mga tugang na lalaki maninigo na maghingoang tumabang na mahipnoan an mga pangangaipong ini sa kongregasyon.

Puedeng suportaran kan kamagurangan an pag-oswag kan kongregasyon paagi sa pagsegurado na an mga grupo kan pag-adal sa libro kan kongregasyon may tama sanang kadakulaan asin naaasikasong marhay sa espirituwal patin na sinda nagtitiripon sa mga lugar na kombenyente. Kun praktikal, maninigong mag-organisar nin bagong mga grupo tanganing lubos na maaprobetsaran nin gabos an mga pakinabang sa daing kaagid na espirituwal na areglong ini. Puede daw nindong ialok an saindong harong bilang lugar sa pag-adal sa libro? An dakol na naggibo kaiyan nakaeksperyensia nin espirituwal na mga bendisyon.