Pinakaepektibo an Pagigin Simple
1 Taano an hoben na mga parahayag ta parateng nakukua an atension kan mga hinihirasan ninda kan mensahe kan Kahadean? An sarong dahelan iyo na simple an saindang mga pananaram. May mga parahayag na naghohona na tangani na makapatotoo nin epektibo kaipuhan an pag-atubang na magayonon an pagkasabi. Minsan siring, ipinaheheling nin eksperyensia na pinakaepektibo an sarong simple asin malinaw na pag-atubang.
2 Ibinalangibog ni Jesus an Kahadean nin Dios sa simple, deretso sa puntong paagi asin sinanay an mga disipulo nia na iyan man an gibohon. (Mat. 4:17; 10:5-7; Luc. 10:1, 9) Sia naggamit nin bakong komplikadong mga introduksion, hapot, asin ilustrasyon tangani na makua an atension kan mga naghihinanyog sa saiya asin maabot an saindang puso. (Juan 4:7-14) Marahay na arogon niato an saiyang halimbawa asin magtao nin mga pag-atubang na pasil masabotan.
3 An ‘maogmang bareta kan kahadean’ an mensahe na dapat niatong ibalangibog. (Mat. 24:14) An paggamit kan Kahadean bilang saindong pundamental na tema makatatabang na mapagdanay na simple an saindong pag-atubang. Magtaram nin mga bagay na may labot sa mga naghihinanyog sa saindo. An mga babae parateng mas interesado sa saindang pamilya kisa politikal na mga tema. An presenteng kinahahaditan nin sarong ama iyo an saiyang trabaho asin an pagigin ligtas sa peligro kan saiyang pamilya. Interesado an mga hoben sa saindang ngapit; an mga may edad na, sa mas marahay na salud asin sa saindang seguridad. Sa parate mas interesado an mga tawo manongod sa lokal na mga pangyayari kisa mga nangyayari sa hararayong nasyon. Pakatapos na makipag-olay manongod sa mga bagay na pinagkakainteresan kan kadaklan, darahon an atension sa mga bendisyon na kakamtan kan makinuyog na katawohan sa irarom kan pamamahala kan Kahadean nin Dios. An pira sanang simple, piniling marhay na mga tataramon na inibanan nin sarong teksto iyo an puedeng magin pinakaepektibong paagi tangani na mapukaw an interes kan mga naghihinanyog sa saindo.
4 Puede nindong ponan an pakikipag-olay paagi sa pagsabing:
◼ “Mayong duda na minaoyon kamo na an katawohan dinadamat nin dakol na dai na mabobolong na helang. Alagad aram daw nindo na an Dios nanuga na hahaleon nia sa dai na mahahaloy an gabos na klase nin helang, siring man an kagadanan?” Pasimbagon, dangan basahon an Kapahayagan 21:3, 4.
5 Paagi sa malinaw asin simpleng mga pag-atubang, maabot logod nindo an isip asin puso nin dakol pang tawo sa saindong teritoryo, na tinatabangan sindang manodan an manongod ki Jehova asin an paglaom na makamtan an buhay na daing katapusan.—Juan 17:3.