“An Tataramon nin Dios . . . Mapuersa”
1 “An tataramon nin Dios buhay asin mapuersa,” an surat ni apostol Pablo. (Heb. 4:12) Ano an boot niang sabihon kaiyan? An tataramon, o mensahe nin Dios, na yaon sa Biblia puedeng magkaigwa nin makosog na impluwensia sa mga tawo. An kadonongan na yaon sa Biblia may puersa na bagohon an buhay nin saro na magin mas marahay. An iinaalok kaiyan na karangahan asin paglaom irinarani an mga tawo sa Paratao nin Buhay, si Jehova Dios. An mensahe kaiyan puedeng papoonon an mga sadiosan an puso na lumakaw sa dalan pasiring sa buhay na daing sagkod. Minsan siring, tangani na maheling an mga epektong ini, dapat na gamiton niato an Biblia kun kita nagpapatotoo sa iba.
2 Bumasa nin Sarong Teksto sa Lambang Oportunidad: Minalataw na dakol na parahayag an bihira nang gamiton an Biblia sa mga harong. Totoo man daw iyan saindo? Huling dakol na tawo an garo baga mayong panahon para sa halawig na pakikipag-olay, tibaad nagin ugale na nindong mag-alok na sana nin mga babasahon o sambiton na sana an kahulogan nin sarong teksto. Ineenkaminar niamo an gabos na parahayag na gumibo nin odok na paghihingoa na bumasa nin kisuerra sarong bersikulo sa Biblia kun iinaatubang an maogmang bareta, sa siring tinotogotan an tawo na maheling na an mensahe niato tunay nanggad na yaon sa Tataramon nin Dios.
3 Minsan ngani pipira sanang tawo an ginigibong ugale an pagbasa kan Biblia, iyan iginagalang pa man giraray sa pankagabsan. Dawa an sibot na mga tawo parateng nagtatao nin saro o duwang minuto tangani na maghinanyog sa mensahe na direktang binabasa sa Tataramon nin Dios. Kun may init na binabasa an sarong angay na teksto asin ipinaliliwanag iyan sa halipot, an puersa kan tataramon ni Jehova puedeng magkaigwa nin marahay na epekto sa naghihinanyog. Alagad paano nindo ikakokonektar an saindong pambukas na mga komento sa pagbasa nin sarong bersikulo sa Biblia?
4 Probaran Ini sa Pagwaras nin Magasin: An sarong nagbibiaheng paraataman epektibong ginagamit an Kasuratan kun nagwawaras nin magasin. Sia nagdadara nin sarong sadit na Biblia sa bulsa nia. Pakatapos na iatubang an mga magasin asin itampok sa halipot an sarong artikulo, daing pag-alangan na binubuksan nia an Biblia asin binabasa an sarong bersikulo na konektado sa artikulo. Ini puedeng magibo paagi sana sa paghapot nin, “Ano an saboot nindo manongod sa nakaparirigon sa boot na panugang ini?” dangan pagpapadagos sa pagbasa nin sarong piniling teksto.
5 Gibohon na pasohan nindo na ihiras an saro o duwang bersikulo sa Biblia sa lambang naghihinanyog. An nakamomotibar na puersa kaiyan puedeng magbukas kan dalan tanganing dakol pang tawo an rumani sa Dios.—Juan 6:44.