Gamiton nin Epektibo an Biblia
1. Ano an puede nindong gibohon bilang pag-andam para sa ministeryo sa langtad?
1 Ano man na babasahon an plano niatong ialok sa ministeryo, kapakipakinabang na pumili nin nakakapukaw nin isip na teksto na babasahon sa mga maghihinanyog. (Heb. 4:12) An pagpili nin sarong teksto na ginamit sa publikasyon na iaalok nindo makakatabang na magin epektibo an pagbalyo pasiring sa publikasyon. Sa nagkapirang lugar, nanompongan nin mga parahayag na kapakipakinabang na kapot na ninda an Biblia kun minadolok sa sarong tawo o kun naghaharongharong.
2. (a) Paano niato poponan an satong pag-atubang paagi sa sarong teksto? (b) Anong mga tema sa Kasuratan an interesante sa mga tawo sa teritoryo?
2 Magpoon Paagi sa Sarong Teksto: May mga parahayag na pinoponan an saindang pag-atubang paagi sa paghapot sa kagharong nin sarong simpleng hapot sa punto de vista manongod sa sarong teksto sa Biblia na kasunod nindang babasahon. Dinadara tolos kaini an atension sa Tataramon nin Dios. Magigin epektibo daw sa saindong teritoryo an nagkapira sa minasunod na mga introduksion na ini?
◼ “Kun may kakayahan kamo, gigibohon daw nindo an mga pagbabagong ini?” Basahon an Kapahayagan 21:4.
◼ “Taano daw ta nabubuhay kita sa grabe kadelikadong mga panahon?” Basahon an 2 Timoteo 3:1-5.
◼ “Sa paghona daw nindo magigin mas marahay an satong komunidad kun an gabos nagkukuyog sa sadol na ini?” Basahon an Mateo 7:12.
◼ “Sa paghona daw nindo maeeksperyensiahan pa kan mga aki nindo an mga kamugtakan na sinabi digdi?” Basahon an Salmo 37:10, 11.
◼ “Sa paghona daw nindo maabot pa an panahon na magkakatotoo an mga tataramon na ini?” Basahon an Isaias 33:24.
◼ “Pamilyar daw kamo sa pagbago nin gobyerno na nasambitan digdi?” Basahon an Daniel 2:44.
◼ “Haloy na daw na gusto nindong ihapot ini sa Dios?” Basahon an Job 21:7.
◼ “Posible daw na maheling giraray an satong gadan nang mga mahal sa buhay?” Basahon an Juan 5:28, 29.
◼ “Aram daw kan mga gadan kun ano an ginigibo kan mga buhay?” Basahon an Eclesiastes 9:5.
3. Paano niato matatabangan an mga tawo na masabotan an mga teksto sa Biblia na binasa niato?
3 Ipaliwanag, Iilustrar, Iaplikar: Kun gusto nin saro na makipag-olay, dai tolos dumiretso sa orolay. Tawan nguna nin panahon na ipaliwanag, iilustrar, asin iaplikar an teksto na binasa nindo tangani na masabotan nia iyan. (Neh. 8:8) Kun nasasabotan asin inaako nin mga tawo an itinotokdo kan Tataramon nin Dios, puedeng magbunga iyan nin makangangalas na mga pagbabago sa saindang buhay.—1 Tes. 2:13.
4. Paano niato magagamit nin epektibo an Biblia sa mga pagdalaw liwat?
4 Padagos na gamiton nin epektibo an Biblia mantang kinukultibar nindo an interes. Puede nindong gamiton an iyo man sanang paaging ini kun nagdadalaw liwat: (1) Pumili nin angay na teksto. (2) Magpalataw nin sarong simpleng hapot sa punto de vista mapadapit sa tekstong iyan. Dangan basahon iyan. (3) Ipaliwanag, iilustrar, asin iaplikar iyan. Magmaigot na dagdagan an kaaraman kan tawong iyan manongod sa Tataramon nin Dios kada pagdalaw nindo. Sa dai mahaloy tibaad nagkokondukta na kamo nin pag-adal sa Biblia!