“Ako Marigon na Naninindogan! Ako Marigon na Naninindogan! Ako Marigon na Naninindogan!”
1 An mga tataramon na iyan nin sarong fiel na Kristiano na nakaligtas sa Holocaust inoorootro an determinasyon kan rinibong Saksi—na buhay asin gadan—na nagin marigon sa saindang pagtubod sa ibong kan karingisan nin Nazi. (Efe. 6:11, 13) An nakapupukaw sa boot na estorya ninda manongod sa kosog nin boot asin kapangganahan isinasaysay sa nakapahihiro sa pusong video na Jehovah’s Witnesses Stand Firm Against Nazi Assault. Sinasadol an gabos sa kongregasyon na dalanon iyan asin ipahayag sa lambang saro an saindang mga impresyon asin saboot.
2 Togotan an mga hapot na ini na animaron an saindong kaisipan: (1) Sa anong mga rason na an mga Saksi ni Jehova pusoan na nanindogan tumang sa mga Nazi? (2a) Ano an nagin magkatumang na punto de vista kaidto mapadapit sa pagtaong galang, asin taano? (2b) Paano ini nakaapektar sa Saksing mga pamilya? (3) Pirang Saksi an ipinadara sa mga kampo de konsentrasyon, ano an nagin pagmidbid sa sainda duman, asin ano an nagin pagtratar sa sainda kan mga Gestapo? (4) Ano an habong iribay kan mga tugang niato para sa katalingkasan? (5a) Paano asin kasuarin pusoan na nagtaram an mga Saksi ni Jehova tumang sa mga karatan kan rehimen ni Hitler? (5b) Ano an nagin reaksion ni Hitler? (6) Paano an pagkasararo kan banwaan ni Jehova nagin panligtas-buhay para sainda asin sa iba pa, sa pisikal asin espirituwal na paagi? (7) Anong awit na pan-Kahadean an isinurat sa sarong kampo de konsentrasyon? (8) Anong mga halimbawa nin fiel na mga lalaki, babae, asin hoben an nakaiinspirar sa saindo na papagdanayon an saindong integridad ki Jehova, ano man an mangyari? (Helingon man an 1999 Yearbook, pahina 144-7.) (9) Bilang saro sa Mga Saksi ni Jehova, ano an ipinapamate sa saindo kan video na ini manongod sa pagigin bakong kabtang kan kinaban?
3 An pusoan asin nakaparirigon sa boot na halimbawa kan mga Saksi ni Jehova na ipinaheling sa video na Stand Firm makakatabang sa mga hoben, dawa sa bakong mga Saksi, na atubangon an importanteng mga isyu na arog kan dai pagpabaya sa ibang paniniwala, impluwensia nin kairiba, asin konsensia. Kun ika sarong hoben na nag-aadal sa elementarya o hayskul, puede daw na matawan mo nin oportunidad an saimong mga paratokdo na gamiton sa klase an materyal na ini? Tibaad puede mong alokan sinda nin kopya kan video asin sabihon na iyan sarong sadit asin bantog na kasaysayan o sarong dokumentaryo na may moral na leksion.
4 An video na Stand Firm sarong ekselenteng kasangkapan tangani na ikapaheling kun paano an pagtotokdo nin Dios nagtatao sa sato nin espirituwal na kosog na paogmahon an Dios paagi sa pagdadanay na marigon sa tama. (1 Cor. 16:13) Ihiras iyan sa gabos na interesado sa katotoohan.