Mag-andam Na sa Pag-adal kan Hula ni Isaias!
1 “Makakokompiar an fiel na mga parasamba na dai totogotan ni Jehova . . . na mag-eksister an kinaban ni Satanas nin saro pang aldaw kisa hinahagad nin hustisya.” Kanigoan kanakaparirigon sa boot na mga tataramon! Saen daw iyan kinotar? Sa Isaiah’s Prophecy—Light for All Mankind I. Tinatawan daw kita nin dahelan kan hula ni Isaias na magkaigwa nin siring kanakapakokosog sa boot na konklusyon? Iyo! Sa librong iyan kan Biblia, an temang kaligtasan makosog asin malinaw nanggad na idinodoon. (Isa. 25:9) Iyan an dahelan kun taano ta magigin dakulang pagparigon sa boot niato na pag-adalan an kabtang na ini kan Tataramon nin Dios sa Pag-adal sa Libro kan Kongregasyon. Yaon daw kita duman tangani na makamtan iyan serosemana? Taano ta maninigo kitang yaon duman?
2 Sa Isaias 30:20, si Jehova inaapod na satong “Kaharohalangkaweng Paratokdo.” An lambang Kristiano maninigong maghinanyog nin maingat mantang si Jehova nagtataram sa sato paagi sa mga pahina kan saiyang Tataramon asin paagi sa basado sa Biblia na mga publikasyon na itinatao kan “fiel asin may diskresion na oripon.” (Mat. 24:45; Isa. 48:17, 18) Totoo nanggad ini sa librong Isaiah’s Prophecy I. Paano kamo makikinabang nin marhay sa pag-adal kaiyan?
3 Mag-andam Tangani na Makapakikabtang: Magtagama nin bastanteng panahon kada semana sa pag-andam para sa pag-adal sa libro. Basahon an asignadong materyal parapo por parapo. Pag-isipan an kada saro kan inimprentang mga hapot. Markahan an mga simbag sa libro nindo. An mga bersikulo na kinotar hale sa Isaias nasusurat sa mas maitom na letra. Basahon iyan nin maingat. Kun manongod sa iba pang teksto na sinitar, hanapon iyan tangani na maheling kun paano iyan konektado sa materyal. Horophoropon an nanonodan nindo. Dangan ihiras an mga resulta kan saindong pag-andam sa saindong grupo nin pag-adal sa libro.
4 Maninigo na tabangan kan tugang na namamayo sa pag-adal sa libro an gabos na nag-aatender na gamiton nin marahay an Biblia asin apresyaron an praktikal na halaga kan materyal na pinag-oolayan. Kun kamo an enot na apodon sa pagkomento, magtao nin simple, direktang simbag. Kun may nakasimbag na kaiyan, puede nindong dagdagan an paliwanag sa punto na tinotokar. Tibaad puede nindong ipaheling kun paano nagsusuportar sa tema an sarong mayor na teksto. Hingoahon na magkomento sa sadiri nindong tataramon, asin magkamit nin kaogmahan sa pakikikabtang sa pag-orolay.
5 Galaga niatong siyasaton nin iriba an mahalagang marhay na mensahe sa libro ni Isaias. Paririgonon kaiyan an boot niato na mamuhay aroaldaw na magayagayang nag-aantisipar kan pagliligtas ni Jehova!—Isa. 30:18.