United by Divine Teaching—Sarong Pagsiyasat sa Tunay na Pagkasararo Bilang Magturugang
An sarong paraataman sa sirkito nag-atender sa sarong pinamamayohan na pag-adal sa Biblia sa sarong babae na dai pa nagpoon na umatender sa mga pagtiripon kan kongregasyon. Inimbitaran nia ini na dalanon an video na United by Divine Teaching. Kan semanang iyan sia nag-atender sa pagtiripon asin nagsabi na sia maogmang marhay na sia presente. Taano an video na ini ta nagkaigwa nin siring karikas na resulta? Natudok an boot nia sa paglaladawan kaiyan manongod sa satong mahal na marhay na pagkasararo bilang magturugang na ginigibo sa tahaw nin sarong madahas, maongison na kinaban.—Juan 13:35.
Dalanon an video na ini tangani na maheling asin mamatean an katoninongan asin pagkamoot na nakakamtan kan Mga Saksi ni Jehova sa bilog na kinaban. Dangan horophoropon an mga hapot na ini:
(1) Taano an “Pagtotokdo nin Dios” ta angay na tema para sa mga kombension kan 1993-94?—Miq. 4:2.
(2) Ano an nagin kahulogan kan katotoohan sa Biblia para sa nagkapirang pamilya? Ano an nagin kahulogan kaiyan para sa saimong pamilya?
(3) Taano ta importante na matokdoan ni Jehova?—Sal. 143:10.
(4) Anong klaseng mga kadepisilan an dapat na pangganahan tangani na makapag-andam para sa darakulang internasyonal na kombension?
(5) Paano nindo naheling na nagkatotoo an Salmo 133:1 asin Mateo 5:3 sa Kristianong mga kombension na inatenderan nindo?
(6) Ano an hayag sa gabos na ebidensia kan mapuersang mga epekto kan pagtotokdo nin Dios?—Kap. 7:9.
(7) Ano an pinakadakula kasuarin man na lagdoan na pagbautismo sa tunay na mga Kristiano?
(8) Anong mga tataramon ni Miqueas, Pedro, asin Jesus an naootob sa Mga Saksi ni Jehova?
(9) Ano an nagpapatunay sa saimo na an maogma, nagkakasararong pamilya nin tawo bakong pangatorogan sana?
(10) Kiisay nindo ipadadalan an video na ini, asin taano?
Pakadalan kan video na ini, an sarong tugang na babae marahayon an pagkasumaryo kaiyan: “Orog akong tatabangan kan video na girumdomon na kadakol na Kristianong tugang na lalaki asin babae sa bilog na kinaban an sa oras mismong ini maimbod na naglilingkod ki Jehova. . . . Abaa kamahal na marhay kan satong pagkasararo bilang magturugang!”—Efe. 4:3.