Ano an Katuyohan?
1 Taano ta kita namamayo nin mga pag-adal sa Biblia? Tangani sanang magtao nin kaaraman, mapaoswag an buhay nin mga tawo, o paliwanagon an paglaom ninda para sa ngapit? Dai. An satong pinakakatuyohan iyo na gumibo nin mga disipulo ni Jesu-Cristo! (Mat. 28:19; Gibo 14:21) Iyan an dahelan kun taano an satong mga inaadalan ta kaipuhan na makiasosyar sa kongregasyon. An pag-oswag ninda sa espirituwal direktang konektado sa saindang pakasabot sa Kristianong organisasyon.
2 Kun Paano Iyan Magigibo: Sa kapoonpooni, padagos na sadolon an inaadalan na umatender sa mga pagtiripon kan kongregasyon. (Heb. 10:24, 25) Ipaliwanag kun paano ini mapakosog sa pagtubod nia, matabang sa saiya na gibohon an kabotan nin Dios, asin mapangyari sa saiya na magkaigwa nin nakararahay na pakikiasosyar sa iba na mawot man na mag-omaw ki Jehova. (Sal. 27:13; 32:8; 35:18) An saindong personal na mga kapahayagan nin pagkamoot asin pag-apresyar sa kongregasyon patin sa mga pagtiripon aanimaron an pagmawot nia na umatender.
3 Kaipuhan na masabotan kan mga bagohan na an organisasyon ni Jehova internasyonal na kasararoan nin magturugang. Ipadalan sa sainda an video na Jehovah’s Witnesses—The Organization Behind the Name asin Our Whole Association of Brothers. Tabangan sindang masabotan na ginagamit ni Jehova an minilyon na nagdusay na indibiduwal sa bilog na kinaban tangani na gibohon an saiyang kabotan. Ipaaram sa mga bagohan na ini na sinda iniimbitaran na maglingkod man sa Dios.—Isa. 2:2, 3.
4 Dahelan nin grabe kadakulang kagayagayahan na maheling an inaadalan sa Biblia na magin sarong tunay na disipulo ni Jesus. Iyan an satong katuyohan!—3 Juan 4.