Sarong Espesyal na Pagparinigonan nin Boot
1 Daing aldaw na minaagi na an banwaan ni Jehova dai napapaatubang sa mga pagbalo sa saindang pagtubod. Sa pakaaram na halipot na sana an saiyang panahon, an Diablo naggigibo nin pangultimong pagsalakay tangani na raoton an satong integridad ki Jehova. (Kap. 12:12) Mahalagang marhay na kita ‘padagos na magkaigwa nin kosog sa Kagurangnan asin sa kapangyarihan kan saiyang kosog’ tanganing kita ‘makapanumang sa maraot na aldaw asin, pakagiboha niato nin lubos kan gabos na bagay, marigon na tumindog.’—Efe. 6:10, 13.
2 An pakipagtipon sa mga kapagtubod sarong probisyon hale ki Jehova na matabang sa sato na magkaigwa nin kosog. Inapresyar ini ni apostol Pablo. Minawot nia na makaiba an saiyang Kristianong mga tugang tanganing sinda “iribang maenkaminar” asin “maparigon.” (Roma 1:11, 12, nota sa ibaba) Tangani na pasarigon kita sa paggibo kan kabotan nin Dios, mamomoton na iinareglo kan Namamahalang Grupo na tawan kita kan oportunidad na makinabang sa pagparinigonan nin boot sa nagdadangadang na “Diosnon na Pagkuyog” na Pandistritong Kombension.
3 Umatender Tangani na Makinabang: Gibohon nindong pasohan na umatender sa bilog na tolong aldaw. ‘Pinakikinabang niato an satong sadiri’ paagi sa pag-abot bago an enot na awit asin pagdadanay sagkod sa odok sa pusong pagsabi niato nin “Amen” sa pantapos na pamibi. (Isa. 48:17, 18) An dakol kaipuhan na iareglo nin amay pang marhay an saindang iskedyul sa trabaho tanganing magkaigwa sinda nin panahon na umatender sa bilog na tolong aldaw. Totoo, tibaad bakong pasil na kaolayon an saindong among na togotan kamong magbakasyon, alagad inaasegurar kita ni Jehova na tatabangan nia kita tangani na magibo an saiyang kabotan. (1 Juan 5:14, 15) Kun iyan dai pa niato nagigibo, ngonyan na an panahon na gumibo nin depinidong mga areglo para sa transportasyon asin dadagosan, na dai nagsasabing bahala na pag-abot kan oras. Makakakompiar kita na bebendisyonan ni Jehova an satong mga paghihingoa na umatender sa bilog na tolong aldaw.—Tal. 10:22.
4 Antisiparon an Pagparigon sa Boot: Naghale na daw kamo sa sarong pandistritong kombension, na nagsasabing: “Idto an pinakamagayon kasuarin man!” Taano ta tibaad siring kaiyan an saboot nindo? Iyan huli ta bilang bakong sangkap na mga tawo kita puedeng luway-luway na manluya, na nasa kamugtakan na nagkakaipo nin espirituwal na pagparigon sa boot. (Isa. 40:30) Nagkomento an sarong tugang na babae: “Nanluluya ako huli sa sistemang ini nin mga bagay, asin ipinopokus giraray kan mga kombension an sakong espirituwal na punto de vista, na nagtatao sa sako nin espirituwal na tabang na kaipuhan ko. Garo baga minaabot an pagparigon sa boot sa tamang panahon na kaipuhan kong marhay iyan.” Posibleng marhay na naeksperyensiahan na man nindo an siring na saboot.
5 Nag-aako kita nin kinakaipuhan na pagparigon sa boot bako sanang paagi sa mga pahayag asin interbio kundi paagi man sa iba pang abundang aspekto kan satong mga kombension. Nagkomento an sarong tugang na lalaki: “An talagang naaapresyar ko iyo an malinaw asin praktikal na pag-aplikar kan mga prinsipyo sa Biblia. Siempre, mahalagang marhay an mga drama sa pagpaheling kun paano kita makikinabang sa nakaaging mga halimbawa, marahay man sagkod maraot. Pirme kong inaantisipar an mga ilinuluwas na babasahon, asin danay na ikinakaogma ko iyan pagpuli ko.”
6 An mga kombension mahalagang marhay na probisyon hale ki Jehova durante kan “delikadong mga panahon [na ini] na masakit pakibagayan.” (2 Tim. 3:1) Nakakatabang iyan sa sato na himateon an ipinasabong na sadol: “Magpuka kamo, manindogan na marigon sa pagtubod, magpakalalaki kamo, magin makosog kamo.” (1 Cor. 16:13) Kun siring, magin determinado kitang umatender sa gabos na sesyon asin magkamit nin nagsosopay na pagparinigonan nin boot sa satong “Diosnon na Pagkuyog” na Pandistritong Kombension!
[Kahon sa pahina 3]
Magplanong Umatender sa Bilog na Tolong Aldaw
■ Humagad nin bakasyon sa trabaho.
■ Magreserba nin dadagosan sa lugar kan kombension, kun kaipuhan.
■ Iareglo an transportasyon pasiring sa kombension.