Pagtipon sa mga Tawo Hale sa Gabos na Tataramon
1 Naootob an Tataramon nin Dios! An mga tawo “hale sa gabos na tataramon kan mga nasyon” nag-aako kan tunay na pagsamba. (Zac. 8:23) Paano tinatabangan kan Mga Saksi ni Jehova an mga indibiduwal kan gabos na ‘tribo, banwaan, asin tataramon’ na magkaigwa nin malinig na kamugtakan sa atubangan ni Jehova, na may paglaom na maligtas sa “dakulang kahorasaan”?—Kap. 7:9, 14.
2 Huminiro an Organisasyon nin Dios: Iinareglo kan Namamahalang Grupo na magkaigwa nin mga babasahon sa Biblia sa mga 380 tataramon tanganing an mga tawo sa bilog na daga makasabot nin malinaw kan importansia kan maogmang bareta. An pag-andam asin pagpublikar nin mga babasahon sa kadakol na tataramon sarong dakulaon na gibohon. Kalabot dian an pagporma nin mga grupo nin kualipikadong mga paratradusir asin pagtao sa sainda nin suporta na kaipuhan ninda sa pagtradusir kan satong mga babasahon sa gabos na tataramon na ini, saka sa pag-imprenta asin pagpaktora kan materyales. Minsan siring, an mayor na kabtang ginigibo kan indibiduwal na mga parahayag kan Kahadean, na nagdadara kan panligtas-buhay na mensahe kan Biblia sa mga tawo.
3 Pag-ako kan Angat: Darudakulang mga populasyon na iba an tataramon an manonompongan na ngonyan sa dakol na lugar. Tangani na mapaabotan kan maogmang bareta an mga tawong ini, padakol nang padakol na lingkod nin Dios an naghihingoa na mag-adal nin Intsik, Ruso, Kastila, o nagkapirang iba pang tataramon na lakop sa saindang lugar. An iba nag-aadal nin Pagtaram sa Senyas. Sa Estados Unidos sana, igwa nin mga 2,900 na kongregasyon asin 240 grupo na naghuhulit sa 38 tataramon apuera sa Ingles. An nagkapira na dai pa noarin man nakadangog manongod ki Jehova o mayo nin aram manongod sa Biblia nag-aako kan katotoohan kan Tataramon nin Dios.—Roma 15:21.
4 Puede daw kitang mas lubos na maghingoa sa pagpahayag kan maogmang bareta sa mga tawo sa satong teritoryo na hale sa ibang kultura? (Col. 1:25) Dakol na kongregasyon an nag-oorganisar nin paghuhulit sa lokal na komunidad nin mga taga ibang nasyon. An mga parahayag nag-aadal ngunang marhay kan tataramon tangani na makatao nin simpleng pag-atubang, arog baga kan: “Kumusta. May maogmang bareta para saindo. [Dangan nag-aalok nin pulyeto o brosyur na igwa sa tataramon na iyan.] Paaram.” Tunay na binebendisyonan ni Jehova an siring na sadit na mga pagpoon!
5 An mensahe kan Kahadean nakaaakit sa mga tawo sa gabos na pinaghalean asin tataramon. Aprobetsaran niato an oportunidad na ihiras iyan sa sainda.