Bagong Programa nin Pansirkitong Asamblea
1 Tangani na makapanindogan nin marigon sa pagtubod sa sarong kinaban na daing karigonan, dapat kitang magtiwala ki Jehova. Ano an kahulogan kaini sa aroaldaw na buhay? Paano an pagtitiwala ki Jehova nakakaapektar sa satong personal asin pampamilyang buhay? Paano iyan nakakatabang sa sato na labanan an impluwensia kan kinaban ni Satanas? An mga hapot na ini sinisimbag kan programa nin pansirkitong asamblea para sa 2003. An tema kaiyan “Magtiwala ki Jehova Asin Gumibo nin Marahay.”—Sal. 37:3.
2 An satong pagtitiwala ki Jehova bako sanang sa espesyal na mga okasyon o panahon nin makuring pangangaipo. Apektado kaiyan an satong aroaldaw na buhay. Idinodoon ini sa pambukas na pahayag na, “Magtiwala ki Jehova sa Gabos na Panahon.” (Sal. 62:8) An apat na kabtang na simposium na “Pagpaheling nin Pagtitiwala ki Jehova” ipaheheling sa sato kun paano hahanapon asin iaaplikar an basado sa Bibliang impormasyon na makakatabang sa sato sa pagtogdok nin mapangganang pag-agoman, pagresolber sa mga problema na minalataw sa laog nin pamilya, asin pagpanigo sa satong materyal na mga pangangaipo.
3 Pinagmamaigotan kan kinaban ni Satanas na ipirit sa sato an biribid na pagmansay sa kun ano an tama asin sala patin magpangyari nin karibarawan sa kun ano an importante asin bakong importante. (Isa. 5:20) An mga pahayag na “Magmaan sa mga Bagay na Daing Kamanungdanan sa Buhay” asin “Rayoan an Maraot—Magin mga Paragibo nin Karahayan” mapakosog kan satong determinasyon na suportaran an halangkawon na mga pamantayan ni Jehova.—Amos 5:14.
4 Kun taposon na ni Jehova an presenteng maraot na sistema nin mga bagay, an mga lingkod nin Dios kaipuhan na magtiwala nin lubos sa saiya. Itinatampok ini sa pampublikong pahayag na, “Harani Na an Pagkaligtas sa Kasakitan kan Kinaban.” Pakatapos kaiyan, iimbitaran kitang siyasaton an satong sadiri sa kabtang na “Ibibilang daw Kamong Angay sa Kahadean nin Dios?” Matatapos an programa paagi sa sadol na “Magtiwala sa mga Panuga ni Jehova.”
5 Sarong tampok na kabtang nin lambang asamblea an pahayag sa bautismo. An siisay man na boot na magpabautismo maninigong magsabi sa nangengenot na paraataman sa pinakamadaling panahon na mapupuede tangani na magibo an kinakaipuhan na mga areglo.
6 Sa daing kasegurohan na mga panahon na ini, solamente si Jehova an tunay na gikanan nin kompiansa asin karigonan. (Sal. 118:8, 9) Logod na pakosogon niato gabos an satong pagtitiwala sa saiya paagi sa pagigin presente sa bilog na programa nin pansirkitong asamblea.