Bagong Programa sa Pansirkitong Asamblea
Aram niato na si Jehova Dios maninigo sa satong pagkamoot asin sa satong dai nababangang debosyon. Minsan siring, an kinaban naghihingoang tentaran kita parayo sa pagpapadanay kan satong dayupot na relasyon sa saiya. (Juan 17:14) Tangani na pasarigon an satong pagkamoot ki Jehova asin pakosogon kita na labanan an mga bagay kan kinaban na nagsasapeligro kan satong espirituwalidad, an bagong programa sa pansirkitong asamblea para sa 2001 magkakaigwa nin tema na “Kamotan an Dios—Bakong an mga Bagay kan Kinaban.”—1 Juan 2:15-17.
An hararom na pagkamoot ki Jehova nagpapahiro sa sato na magpatotoo dapit saiya. Dawa siring, an paglilingkod sa langtad bakong pasil para sa dakol sa banwaan nin Dios. Sa kabtang na “An Pagkamoot sa Dios Nagmomotibar sa Sato sa Satong Ministeryo,” aramon kun pira an nakapanggana sa pagkamasosopgon asin iba pang mga balakid tanganing makapakikabtang nin lubos sa gibohon na ini.
Paano kita naiimpluwensiahan kan nagrururong mga pamantayan kan kinaban? An hiro-hiro na kaidto ibinibilang na maraot normal na gawe-gawe na daa ngonyan. An pahayag na “An mga Namomoot ki Jehova Naoongis sa Maraot” asin an simposium na “Mga Bagay sa Kinaban—Ano an Pagmansay Niato Dian?” pasasarigon an satong determinasyon na sayumahan an salang mga pagmawot.
Iiiba sa programa an sarong modelong Teokratikong Paadalan sa Pagmiministro asin Pagtiripon sa Paglilingkod, siring man an sumaryo kan artikulong pag-aadalan sa Torrengbantayan para sa semanang iyan. An pampublikong pahayag na, “Kun Paano Dinadaog kan Pagkamoot Asin Pagtubod an Kinaban,” paririgonon an boot niato na arogon si Jesus sa paglaban sa kinabanon na mga impluwensia. (Juan 16:33) Seguradohon na imbitaran na umatender an mga inaadalan nindo sa Biblia. An siisay man na boot na magpabautismo maninigong magsabi sa nangengenot na paraataman sa pinakamadaling panahon na mapupuede tanganing magibo an kinakaipuhan na mga areglo.
Ikokonsentrar kan pansirkitong asambleang ini an satong atension manongod sa kun saen talaga maninigong isentro an satong pagkamoot tanganing makamtan an nagsosopay na mga bendisyon ni Jehova. Dai paglipasan an arin man kaiyan!