Tabang sa Tamang Panahon

¹ Kan maaraman ni apostol Pedro an pangangaipo na pakosogon an mga kapagtubod, an pagmalasakit an nagpahiro sa saiya na tawan sinda nin mamomoton na mga pagirumdom asin pagparigon sa boot. (2 Ped. 1:​12, 13; 3:1) Sinadol nia an “mga nagkamit nin pagtubod” na padagos na tumalubo sa espirituwal na mga kualidad tangani na dai magin “inaktibo o daing bunga mapadapit sa tamang kaaraman kan satong Kagurangnan na Jesu-Cristo.” (2 Ped. 1:​1, 5-8) An katuyohan ni Pedro iyo na tabangan sindang masierto an pag-apod asin pagpili na inako ninda ki Jehova, tangani na sinda tibaad “sa katapustapusi makua niang daing digta asin dai nin kanawayan patin nasa katoninongan.” (2 Ped. 1:​10, 11; 3:14) Para sa dakol, an saiyang pagparigon sa boot nagin tabang sa tamang panahon.

² Ngonyan, an Kristianong mga paraataman igwa nin parehong pagmalasakit sa banwaan nin Dios. Sa “delikadong mga panahon [na ini] na masakit pakibagayan,” dapat na atubangon kan dakol na lingkod ni Jehova an masakit na mga sirkunstansia. (2 Tim. 3:1) Huli sa nagpapadagos na pinansial, pampamilya, o personal na mga problema, an nagkapira tibaad magsaboot arog ki David: “Pinalibotan ako nin mga kalamidad sagkod na dai na iyan mabilang. Inabotan ako kan mga sala ko na mas dakol kisa kaya kong helingon; an mga iyan nagin mas dakol kisa mga buhok sa sakong payo, asin binayaan ako kan sakong puso.” (Sal. 40:12) An mga pangigipit na ini puedeng magin dakulaon kaya an mga siring tibaad mapabayaan na an mahalagang marhay na espirituwal na mga bagay asin pumondo na sinda sa aktibong pakikikabtang sa Kristianong ministeryo. Pero, sa ibong kan saindang mga kasakitan, ‘dai ninda nalingawan an mga togon ni Jehova.’ (Sal. 119:176) Ngonyan an tamang panahon na an kamagurangan magtao sa mga siring nin kaipuhan na tabang.​​—Isa. 32:​1, 2.

³ Tangani na mapanigoan an pangangaipong ini, inenkaminar an kamagurangan na gumibo nin espesyal na paghihingoa na tabangan an mga dai nakikikabtang sa paghuhulit sa presente. Sarong durungan na paghihingoa na mahaman ini an ginigibo na ngonyan asin magpapadagos sagkod sa katapusan kan bulan nin Marso. Hinahagad sa mga paraataman sa pag-adal sa libro na dalawon an mga inaktibo tangani na magtao nin espirituwal na tabang sa katuyohan na tabangan sindang ipagpadagos an saindang aktibidad kaiba kan kongregasyon. Kun kaipuhan, puedeng mag-areglo nin personal na pag-adal sa Biblia. An iba puedeng pakiolayan na tumabang. Kun inimbitaran kamong gibohon iyan, puedeng magin kapakipakinabang na marhay an saindong mga paghihingoa, nangorogna kun matao kamo nin pagparigon sa boot sa maboot, mapagsabot na paagi.

⁴ May dahelan an gabos na maggayagaya kun ponan liwat nin saro an saiyang aktibidad kaiba kan kongregasyon. (Luc. 15:6) An satong mga paghihingoa na parigonon an boot kan mga inaktibo puede nanggad na magbunga nin “tataramon na itinaram sa tamang kapanahonan kaiyan.”​—Tal. 25:11.