An Pagretiro—Saro daw na Pinto Pasiring sa Nadugangan na Aktibidad?
1 Dakol na mahigos na tawo an naghihidaw sa panahon na an pagretiro mapatalingkas sa sainda sa kapagalan asin sakit nin sekular na trabaho. Pero, parateng gayo na an pagretiro nagreresulta sa pagkaindiperente, pagkalangkag, asin mayo pa sa panahon na paggurang. An kadaihan nin makatuyohan na aktibidad gigibohon an isip na magin preokupado sa mga paghadit dapit sa sadiri. An sarong peryodiko sa Brazil nagbareta na an retiradong mga empleyado sa gobyerno irineklamo an mga problema magpoon sa ‘pagkadiskontento, pagigin iritable, takot asin kahaditan, asin pagigin daing serbi sagkod sa depresyon asin pakamate na an saindang kinaban matatapos na.’
2 Sa kabaliktaran, minamansay nin dakol na Kristiano an bagong kabtang na ini sa saindang buhay bilang sarong pinto pasiring sa nadugangan na espirituwal na aktibidad. An sarong tugang na lalaki na nagpoon na magpayunir duwang semana pagkatapos na aboton nia an edad na 65 nagsabi: “Nungka akong nakaeksperyensia nin panahon sa sakong buhay na nagin pano-pano nin mga bendisyon na arog kan nakaaging sampulong taon nin pagpapayunir.” An sarong mag-agom nagsurat: “An samuyang tunay na pinakamaogmang mga taon nagpoon kan kami pumoon na magpayunir.” Iyo, para sa dakol, an pagretiro nag-aalok nin sarong marahayon na oportunidad tanganing pahiwason an saindang ministeryo asin mag-ani nin mayaman na mga bendisyon hale ki Jehova.
3 Pagdadanay na Sibot Asin Mabunga: An dakol na retirado na ngonyan nagdakula na mayo kan mga kagianan na lakop ngonyan asin nakanood na magtrabaho nin maigot poon sa amay pang edad. Minsan tibaad mayo na sa sainda an kabagsikan nin pagkahoben, sinda mabungang marhay na mga trabahador pa man giraray. Sa sarong teritoryo nin sangang opisina, an 22 porsiento kan mga payunir—mga 20,000 na tugang na lalaki asin babae— kisuerra 60 anyos an edad. An mga maedad nang ini nakakokontribwir nin dakula sa gibohon na paghuhulit. An saindang eksperyensia asin diosnon na mga kualidad pinaooswag an kamugtakan kan mga kongregasyon na saindang pinaglilingkodan.—Sant. 3:17, 18.
4 An pagdadanay na sibot sa Kristianong ministeryo nakakokontribwir sa mas marahay na salud asin mas marahay na kualidad nin buhay. An sarong 84 anyos na tugang na babae na nagpoon nin pagpapayunir kan sia magretiro nagsabi: “An pamamayo nin dakol na pag-adal sa Biblia sa mga tawong interesado nakatabang sa sako na magdanay na aktibo an isip. Mayo akong kotse, kaya pirme akong naglalakaw. Pinapagdadanay ako kaiyan na makosog.” An sarong mag-agom na payunir na may edad na nagkomento: “An paglilingkod pinapagdadanay kaming marahay an salud sa isip asin hawak. Pirme kaming magkaibanan. Pirme kaming nagngingisi asin naoogma sa buhay.”
5 Paglilingkod Kun Saen May Pangangaipo: An nagkapirang retiradong Kristiano na may marahay na pinansial na kamugtakan nagbalyo tanganing maglingkod kun saen mas dakula an pangangaipo para sa mga parahulit kan Kahadean. An iba pinahiwas an saindang ministeryo paagi sa paglilingkod sa langtad na iba an tataramon. Arog ni apostol Pablo, an maigot na mga parahayag na ini ‘ginigibo an gabos na bagay para sa kapakanan kan maogmang bareta, tanganing ikapaabot [ninda] iyan sa iba.’—1 Cor. 9:23.
6 An sarong mag-agom nagpoon na magpayunir pagkatapos na mapadakula an saindang duwang aking lalaki. Pakalihis nin pirang taon nin pagpapayunir, pinonan ninda na pag-adalan an lenguaheng Intsik. Ngonyan na labi na sindang 70, nagkaigwa sinda kan kagayagayahan kasuarin pa sana na maheling na magin sarong kongregasyon an grupong Intsik na tinabangan ninda. Nagigin bendisyon nanggad an mga mag-agom na arog kaini!
7 Mayo nin Pagretiro sa Ministeryo: Mantang pag-abot nin panahon an kadaklan na tawo nagreretiro sa saindang sekular na trabaho, an siisay man na Kristiano dai nagreretiro sa paglilingkod sa Dios. An gabos dapat na magpadagos na fiel “sagkod sa katapusan.” (Mat. 24:13, 14) Siempre, huli sa paggurang, an nagkapira dai na nagigibo an kapareho kan nagigibo ninda kaidto sa paglilingkod ki Jehova. Alagad nakaparirigon sa boot nanggad na maheling sinda na ginigibo an saindang makakaya sa bilog na pusong paagi! Sinisierto sa sainda kan Tataramon nin Dios na dai lilingawan ni Jehova an saindang ginigibo asin an pagkamoot na ipinaheheling ninda para sa saiyang ngaran.—Luc. 21:1-4; Heb. 6:10.
8 Kun kamo nagdadangadang na sa edad nin pagretiro, taano ta dai mapagngayongayong horophoropon kun paano nindo lubos na magagamit an saindong nagbabagong mga kamugtakan? Sa tabang nin Dios, tibaad manompongan nindo na an pagretiro nagbubukas sa saindo nin sarong pinto pasiring sa nadugangan na aktibidad na nagtatao nin kaomawan ki Jehova asin nin dakol na bendisyon.—Sal. 148:12, 13.