“Kamotan Nindo si Jehova, Kamo Gabos na Maimbod”
An Kagadanan ni Jesus Gigirumdomon sa Abril 4
1 Dakol na taon na an nakaagi, kan an Ucrania sakop pa kan pamamahalang Komunista, ineespiyahan na marhay kan mga autoridad an mga tugang—nangorogna pag-abot kan aldaw kan Pamanggihan nin Kagurangnan—huli ta naglalaom sinda na maaraman an lugar nin pagtiripon ninda. Ini pirme nang problema kaidto, mantang aram kan mga autoridad an haros eksaktong petsa kan pagselebrar. Ano an puedeng gibohon nin mga tugang? Baha an sirong kan harong nin sarong tugang na babae. Mantang dai inaasahan kan mga autoridad na magtiripon duman an mga tawo, naggibo an mga tugang nin salog na kahoy sa ibabaw kan tubig na abot sa tuhod. Minsan ngani kinaipuhan nindang tumukaw na nakalukob sa salog sa sirong nin hababang kisame, mayo nin nandisturbo sa sainda mantang an kongregasyon magayagayang nagseselebrar kan Memorial.
2 An determinasyon kan satong mga tugang na taga Ucrania na kuyogon an pagboot na girumdomon an kagadanan ni Jesus sarong marahayon na pagpaheling kan saindang pagkamoot sa Dios. (Luc. 22:19; 1 Juan 5:3) Kun kita napapaatubang sa mga balakid sa satong buhay, logod na makakua kita nin pamparigon sa boot sa siring na mga halimbawa asin magin determinado kita na magin presente sa pagselebrar kan Pamanggihan nin Kagurangnan sa Abril 4. Sa paggibo kaiyan, ipinaheheling niato na an mga saboot niato kapareho kan sa salmista na nag-awit: “O kamotan nindo si Jehova, kamo gabos na maimbod sa saiya.”—Sal. 31:23.
3 Tabangan an Iba na Tumalubo sa Pagkamoot sa Dios: An pagkamoot sa Dios nagpapahiro man sa sato na imbitaran an iba na magselebrar kaiba niato. An suplemento kan An Satong Ministeryo sa Kahadean na Pebrero inenkaminar an lambang saro sa sato na gumibo nin lista kan mga plano niatong imbitaran sa Memorial. Kamo daw maigot na nagpapadagos sa pag-imbitar sa lambang saro na nasa lista nindo? Tawan nin panahon an pagpaliwanag sa sainda kan kahulogan kan okasyon. Puedeng maenkaminar sindang umatender paagi sa maboot na pagpagirumdom kan aldaw asin oras kan Memorial asin, kun angay, pag-alok na ibanan sinda.
4 Sa selebrasyon, gumibo nin espesyal na paghihingoa na taratarahon an mga nag-ako kan satong imbitasyon, asin maogma sindang akoon. Paano nindo sinda matatabangan na tumalubo sa saindang pagkamoot ki Jehova? Magin andam na simbagon an saindang mga hapot. Magin listo na mag-alok nin pag-adal sa Biblia kun angay. Imbitaran sinda na umatender sa satong semanal na mga pagtiripon kan kongregasyon. Nangorognang bobooton kan kamagurangan na magtaong atension sa inaktibong mga Kristiano na presente. Puede nindang iareglo na songkoon an mga siring asin enkaminaron sinda na ponan liwat an saindang gibohon, na tibaad dugang pang ipinaliliwanag an mga ideya na iinatubang sa diskurso kan Memorial.—Roma 5:6-8.
5 Pagpararom kan Satong Pagkamoot ki Jehova: An paghorophorop sa balaog na pantubos puedeng pararomon an satong pagkamoot ki Jehova asin sa saiyang Aki. (2 Cor. 5:14, 15) An sarong haloy nang nag-aatender sa Memorial nagsabi: “Hinihimuyawot mi an pagdatong kan Memorial. Iyan nagigin orog na espesyal kada taon. Nagigirumdoman ko an pagtindog sa punerarya 20 taon na an nakaagi, na pinagmamasdan an sakong namomotan na tatay asin an pakamate nin tunay na odok sa pusong pagpahalaga sa pantubos. Bago kaidto iyan saro sanang nasa payong kaaraman. Iyo, aram ko gabos an teksto asin kun paano ipaliliwanag an mga iyan! Pero kan namatean ko an mamondong katotoohan nin kagadanan na an sakong puso talagang luminukso na may kagayagayahan manongod sa gigibohon para sa sato paagi kan mahal na pantubos na iyan.”—Juan 5:28, 29.
6 Mantang nagdadangadang an petsa kan selebrasyon ngonyan na taon, tawan nin panahon na andamon an saindong puso para sa okasyon na iyan. (2 Cron. 19:3) Horophoropon an espesyal na babasahon sa Biblia para sa Memorial, na yaon sa Pagsiyasat sa Kasuratan Aroaldaw—2004 asin sa 2004 Calendar. May mga naoogmang repasohon an kapitulo 112-16 sa librong Greatest Man durante kan saindang pampamilyang pag-adal. An iba naggigibo nin dugang pang pagsiyasat na ginagamit an iba pang pantabang sa pag-adal na itinao paagi sa fiel asin may diskresion na grupong oripon. (Mat. 24:45-47) Kita gabos puedeng odok sa pusong mamibi manongod sa balaog na pantubos. (Sal. 50:14, 23) Iyo, durante kan panahon na ini kan Memorial, logod na padagos niatong horophoropon an pagkamoot ni Jehova sa sato asin humanap nin mga paagi na ipaheling an satong pagkamoot sa saiya.—Mar. 12:30; 1 Juan 4:10.