Bagong Programa sa Pansirkitong Asamblea

Sa “delikadong mga panahon [na ini] na masakit pakibagayan,” kaipuhan niato an diosnon na kadonongan tangani na makamit asin mapagdanay an pag-oyon ni Jehova. (2 Tim. 3:1) An programa sa pansirkitong asamblea para sa 2005 matao sa sato nin praktikal na hatol asin pagparigon sa boot mantang ipinapaliwanag kaiyan an temang “Magpagiya sa ‘Kadonongan Hale sa Itaas.’”​​—Sant. 3:17.

An enot na simposium, “Pagpaheling sa Satong Buhay kan ‘Kadonongan Hale sa Itaas,’” makakatabang sa sato na masabotan kun ano an kalabot sa pagigin mabini, mapagpatoninong, rasonable, asin andam na magkuyog. Dangan tatawan nin atension kan paraataman sa sirkito an tolong iba pang aspekto kan kadonongan hale sa Dios. Tataposon kan paraataman sa distrito an enot na aldaw paagi sa pagpaheling kun paano sinasangkapan an Kristianong mga ministro na magtaram kan kadonongan nin Dios, minsan ngani an pagmansay sa sainda kan nagkapira mga “daing inadalan asin ordinaryo.”​​—Gibo 4:13.

Sa ikaduwang aldaw, an simposium na may temang “Pagmaigotan na Gibohon an mga Bagay na Nakakaparigon” tatabangan kita na maaraman asin malikayan an mga bagay na makakapaluya sa sato sa espirituwal. Ipapaheling man kaiyan sa sato kun paano niato mapaparigon an iba sa mga pagtiripon kan kongregasyon, sa ministeryo sa langtad, asin sa laog kan pamilya. An pampublikong pahayag, “Kun Paano Kita Nakikinabang sa Diosnon na Kadonongan,” papararomon an satong apresasyon sa mga pakinabang na inaako niato mantang iinaaplikar niato sa satong buhay an mga prinsipyo nin Dios. An pantapos na pahayag, “An Paghiro Oyon sa Kadonongan nin Dios Nagpoprotehir sa Sato,” papakosogon an satong desisyon na dumolok ki Jehova para sa kadonongan durante kan huring mga aldaw na ini.

An sarong tampok na kabtang kan lambang asamblea iyo an bautismo nin bagong mga disipulo. Itatampok man sa programa an Teokratikong Paadalan sa Pagmiministro asin an Pag-adal sa Torrengbantayan. Mawot ni Jehova na kita gabos makinabang sa kadonongan na itinatao nia. Maoswag kita sa espirituwal paagi sa hatol asin pagparigon sa boot na naghahalat sa sato sa satong pansirkitong asamblea.​​—Tal. 3:​13-​18.