Pagpaabot kan Maogmang Bareta sa Pinakadakol na Tawong Mapupuede
1. Ano an ginibo kan enot na mga Kristiano tangani na mapaabotan kan maogmang bareta an pinakadakol na tawong mapupuede?
1 An enot na mga parasunod ni Jesus maigot na naghingoang ilakop an mensahe kan Kahadean. Naggibo sinda nin praktikal na mga paagi tangani na ikapaabot an maogmang bareta sa pinakadakol na tawong mapupuede. Isinurat kan Kristianong mga kagsurat sa Biblia an saindang ipinasabong na mga surat sa komun na Griego, na iyo an internasyonal na lenguahe kan Imperyo nin Roma. Dugang pa, an maigot na mga parahulit kan ikaduwa asin ikatolong siglo C.E. padagos posibleng iyo an mga enot na naggamit kan kodise, na mas pasil na gamiton kisa sa sarong balumbon sa paghanap nin mga reperensia.
2, 3. (a) Paano naootob an Isaias 60:16 sa presenteng mga panahon? (b) Paano ginagamit an teknolohiya sa pagpalakop kan dalisay na pagsamba?
2 Paggamit nin Teknolohiya: Paagi ki propeta Isaias, ihinula ni Jehova: “Totoong sususohon mo an gatas kan mga nasyon.” (Isa. 60:16) Sa kaotoban kan hula na ini sa presenteng aldaw, ginagamit kan mga lingkod ni Jehova an mahahalagang rekurso hale sa mga nasyon tangani na palakopon an paghuhulit. Halimbawa, kan 1914, dakol na taon bago nagin mapanggana sa komersio an mga pelikula, pinonan nang ipasale kan mga Estudyante sa Biblia an “Photo-Drama of Creation.” Nagtao nin mapuersang patotoo sa minilyon an walong oras na pelikula asin slide presentation na ini, na kompleto sa kolor asin tanog.
3 Ngonyan, naggagamit an banwaan nin Dios nin marikason na mga imprentahan asin mga kasangkapan na naggagamit nin komputer sa pagpublikar nin mga Biblia asin literatura sa Biblia sa ginatos na lenguahe. Dahel sa marikas na mga paagi nin pagpadara, an mga literatura sa Biblia nakakaabot sa hararayong parte kan daga, na napapaabotan an mga tawo sa 235 nasyon. Paagi sa saiyang espiritu, pinapahiro ni Jehova an mga lingkod nia na gamiton sa praktikal na paagi an siring na teknolohiya, tangani na ikapaabot an katotoohan sa Biblia sa mas dakol na tawo kisa kasuarin man sa kasaysayan.
4. Anong mga pagliliwat sa buhay ninda an ginibo nin nagkapira tangani na mapaabotan kan maogmang bareta an mas dakol na tawo?
4 Personal na mga Pagliliwat: An tunay na mga parasamba namotibar man na gumibo nin personal na mga pagliliwat tangani na mapaabotan kan maogmang bareta an mas dakol na tawo. An dakol pinasimple an buhay ninda tanganing magkaigwa nin mas lubos na pakikikabtang sa paghuhulit. May mga nagbalyo kun saen mas dakula an pangangaipo para sa mga parabalangibog kan Kahadean. An iba pinahiwas an ministeryo ninda paagi sa pag-adal nin ibang lenguahe.
5, 6. Ano an puedeng gibohon tangani na mapaabotan kan maogmang bareta an pinakadakol na tawong mapupuede sa lokal na teritoryo?
5 Dugang pa, mapapaabotan niato kan maogmang bareta an mas dakol na tawo paagi sa paghuhulit sa panahon na nasa harong an mga tawo asin sa lugar na manonompongan an mga tawo. Kun sa saindong teritoryo pirmeng mayo sa harong an mga tawo kun aldaw, puede daw nindong liwaton an iskedyul nindo tangani na magpatotoo durante kan amay na mga oras sa banggi? Igwa daw nin pampublikong mga lugar kun saen puedeng makapagpatotoo? Naprobaran na daw nindo an pagpapatotoo paagi sa telepono asin paghuhulit sa komersial na teritoryo? Naghahanap daw kamo nin mga oportunidad na magpatotoo nin impormal?
6 Kanigoan na pribilehio niato na makikabtang sa dakulang pagpatotoo manongod sa ngaran ni Jehova asin sa Kahadean! Logod na padagos niatong ihiras an nagtatao nin buhay na katotoohan hale sa Tataramon nin Dios sa pinakadakol na tawong mapupuede.—Mat. 28:19, 20.