‘Gibohon an Gabos na Bagay Para sa Maogmang Bareta’

1. Ano an andam na gibohon nin parahulit kan Kahadean para sa iba, asin taano?

¹ Nakamate si apostol Pablo nin personal na obligasyon na ipahayag sa iba an maogmang bareta. (1 Cor. 9:16, 19, 23) Kaagid kaiyan, an satong pagmakolog sa daing sagkod na kapakanan nin mga tawo nagmomotibar sa sato na maghingoang sabihon sa sainda an maogmang bareta.

2. Sa paghuhulit, anong mga pagliliwat an andam niatong gibohon, asin taano?

² Maghulit sa Lugar Asin Oras na Manonompongan an mga Tawo: An matibay na parasira nagdadakop nin sira, bakong sa lugar asin oras na kombenyente sa saiya, kundi sa lugar asin oras na posibleng marhay na may madadakop siang sira. Bilang “mga parasira nin mga tawo,” tibaad kaipuhan man niato na gumibo nin nagkapirang pagliliwat tanganing manompongan an mga tawo sa satong teritoryo asin paagi kaiyan mas lubos niatong ikaogma an pribilehio na pagtipon “nin gabos na klaseng sira.” (Mat. 4:19; 13:47) Puede daw niatong gamiton an amay na mga oras kun banggi sa pagdalaw sa mga tawo sa saindang harong o an amay na mga oras kun aga sa paghuhulit sa tinampo? An pasohan ni Pablo iyo “na lubos na magpatotoo sa maogmang bareta,” asin inaprobetsaran nia an angay na mga oportunidad tanganing gibohon iyan.​—Gibo 17:17; 20:20, 24.

3, 4. Mantang nasa ministeryo, paano niato puedeng ibagay an satong presentasyon, asin may anong mga resulta?

³ Ibagay an Saindong Presentasyon sa Pangangaipo kan mga Tawo: Parateng liniliwat nin mga parasira an saindang mga paagi tanganing makadakop nin sarong partikular na klase nin sira. Paano niato ikakapresentar an maogmang bareta kan Kahadean sa paaging magigin interesante sa mga tawo sa satong teritoryo? Dapat na mataktika kitang mag-introdusir nin sarong tema na interesado an kadaklan na tawo sa teritoryo dangan maingat na maghinanyog sa mga sinasabi ninda mapadapit dian. (Sant. 1:19) Puede kitang magpalataw nin punto de vistang hapot tanganing ikasabi ninda an nasa boot ninda. (Tal. 20:5) Sa paggibo kaiyan, ikakabagay niato an satong presentasyon kan maogmang bareta sa paaging napapahiro an sainda mismong boot. Si Pablo nagin “gabos na bagay sa gabos na klase nin tawo.” (1 Cor. 9:22) Kaipuhan an kakayahan na ibagay an satong presentasyon tanganing maabot an puso nin mga tawo.

⁴ Sarong kagayagayahan nanggad na sabihon sa mga tawo an “maogmang bareta dapit sa bagay na orog karahay”! (Isa. 52:7) Logod na ‘gibohon niato an gabos na bagay para sa maogmang bareta’ tanganing manompongan an pinakadakol na tawo sagkod sa mapupuede.​—1 Cor. 9:23.