Andam Ka daw na Gumibo nin mga Pagliliwat?
1. Huli sa mga pagbabago sa kinaban, anong mga pagliliwat an kaipuhan tang gibuhon?
1 Sa 1 Corinto 7:31, ikinukumparar kan Bibliya an kinaban sa sarong entablado na paburubago an mga eksena asin aktor. Huli sa mga pagbabago sa kinaban, kaipuhan tang gumibo nin mga pagliliwat sa panapanahon sa satong iskedyul, mga paagi nin paghuhulit, asin pagdulok. Andam ka daw na gumibo nin mga pagliliwat?
2. Taano ta dapat kitang gumibo nin mga pagliliwat tanganing makasabay sa organisasyon?
2 An Saimong mga Paagi nin Paghuhulit: Kaidto pa, an Kristiyanong kongregasyon pirmi nang andam na gumibo nin mga pagliliwat. Kan inot na suguon ni Jesus an saiyang mga disipulo, sinabihan niya sinda na dai magbalon nin supot nin kakanon o kuwarta. (Mat. 10:9, 10) Pero, paghaloy-haloy binago niya an mga instruksiyon na iyan bilang pag-antisipar sa mangyayaring pagtumang sa mga disipulo asin pagpahiwas kan paghuhulit sa ibang lugar. (Luc. 22:36) Sa nakaaging siglo, naggamit an organisasyon ni Jehova nin lain-lain na paagi nin paghuhulit—arog kan mga kard sa pagpatotoo, pagbrodkast sa radyo, asin mga awtong may loudspeaker—sigun sa pangangaipo kaidto. Sa dakul na lugar ngunyan, bihira nang maabutan sa harong an mga tawo. Huli kaiyan, apuwera sa pagharong-harong, urog pang idinuon an pagpapatotoo sa publiko asin nin impormal. Dinadagka man kitang magharong-harong sa amay na oras nin banggi kun an mga tawo nasa trabaho kun aldaw. Nakakasabay ka daw mantang nagbabago an direksiyon kan langitnon na karwahe ni Jehova?—Ezeq. 1:20, 21.
3. Paano nakakatabang sa sato an pagigin andam na gumibo nin mga pagliliwat para magin mas epektibo sa satong teritoryo?
3 An Saimong Presentasyon: Ano an ikinakahadit kan mga tawo ngunyan sa lugar nindo? An ekonomiya? Pamilya? Krimen? Kapakipakinabang kun aram ta an presenteng mga problema asin kamugtakan sa satong teritoryo para makapag-andam kita nin angay na presentasyon. (1 Cor. 9:20-23) Kun ipinapahayag kan mga kagharong an sabuot ninda, imbes na sabihon sa sainda an parati tang isinisimbag asin ipadagos an iinandam na presentasyon, mas marahay nanggad na ibagay ta an satong pakikipag-ulay sa ikinakahadit ninda.
4. Taano ta maninigo kitang gumibo tulos nin mga pagliliwat?
4 Dai na nanggad mahahaloy, matatapos na an pangultimong eksena sa entablado kan kinaban na ini, dangan mapuon na an dakulang kahurasaan. “Nainaan na an panahon na natatada.” (1 Cor. 7:29, NW) Kun siring, mahalaga nanggad na gumibo tulos nin mga pagliliwat, tanganing dakulon kitang magibo sa limitadong panahon na natatada!