Bagong Programa sa Pansirkitong Asamblea

Durante kan ultimong mga aldaw kan maraot na daan na kinaban na ini, mahalagang marhay na papagdanayon niato an satong espirituwal na mga gubing asin ingatan an satong Kristianong midbidan. (Kap. 16:15) Kun siring, angay na an tema kan programa sa pansirkitong asamblea para sa 2006 iyo an “Isulog Nindo an Bagong Personalidad.”—⁠Col. 3:10.

Enot na Aldaw: Itatampok kan enot na simposium, “Pagpaheling kan mga Aspekto kan Bagong Personalidad,” kun paano kita makikinabang sa pagkultibar kan bagong personalidad sa gabos na kabtang kan satong buhay. Paano niato kinukultibar an bagong personalidad? Iyan an totokaron sa huring duwang pahayag sa enot na aldaw, “Disiplinahon an Sadiri Tangani na Makapaghorophorop nin Tama” asin “Edukasyon na Nagmomolde kan Bagong Personalidad.”

Ikaduwang Aldaw: Totokaron sa ikaduwang simposium, “Pagkultibar kan Dila kan mga Madonong,” kun paano nakakaimpluwensia an bagong personalidad sa satong paggamit kan dila. “Nadadaog daw Nindo an Maraot?” an tema kan pampublikong pahayag, na itatampok an pangangaipo na magdanay na listo sa mga taktika ni Satanas. An huring duwang pahayag sa asamblea, “Papagdanayon an Saindong Sadiri na Daing Digta kan Kinaban” asin “Pagbago Aroaldaw kan Satong Pagkatawo sa Laog,” tatabangan kita na rayoan an mga aktitud asin gawe-gawe na kontra sa matanos na mga dalan nin Dios asin magdanay na marigon sa satong pagsamba ki Jehova.

Inaantisipar nanggad niato an pag-ako kan pamparigon sa boot na ini na isulog asin papagdanayon an bagong personalidad!