Puede daw na Gumibo nin Maygurang na Desisyon an Saindong Aki?
1. Ano an nagin paninindogan nin mga hoben na Saksi mapadapit sa paggamit nin dugo? Magtao nin halimbawa.
1 Maygurang na desisyon manongod sa ano? Pag-ineksion nin dugo. Siring kan ipinaheling sa artikulong “Walk as Instructed by Jehovah” sa isyu kan The Watchtower na Hunyo 15, 1991, an mga aki kan mga Saksi ni Jehova kaipuhan na maygurang na manindogan tangani na patunayan na an saindang pagmawot na kuyogon an ley nin Dios dapit sa dugo pareho importante para sa sainda asin sa saindang mga magurang. Puede man daw iyan na magin kahagadan sa saindong menor de edad na aki?
2. Anong legal na pamantayan an iinaplikar nin sarong korte sa sarong menor de edad na nagsayumang magpaineksion nin dugo, asin ano an manonodan digdi kan Kristianong mga magurang asin kan saindang menor de edad na mga aki?
2 Ano an Sinasabi kan Ley? Sa pagrepaso sa kaso nin sarong 17 anyos na tugang na babae na nagsayumang magpaineksion nin dugo, nagtao nin dekreto an Korte Suprema sa Illinois sa Estados Unidos: “Kun malinaw asin nakakakombensir an ebidensia na maygurang na an menor de edad na aki na masabotan an magigin mga resulta kan saiyang mga aksion [asin] makapaghusgar siring sa sarong adulto, kun siring an prinsipyo para sa maygurang na menor de edad nagtatao sa saiya nin deretso sono sa ley komun na magtogot o magsayuma sa pagbolong.” Sa siring, sa pagdeterminar kun baga maygurang na an sarong aki na gumibo nin sadiri niang desisyon, puedeng interbiohon kan mga doktor o opisyal an pasyente tangani na madangog sia na ipahayag an saiyang personal na pagsayuma na umako nin dugo. Kaipuhan na rasonableng masabotan kan hoben an pagigin seryoso kan saiyang medikal na kamugtakan asin an magigin mga resulta kan saiyang mga opsion para sa pagpabolong saka malinaw patin marigon na ipahayag an sadiri niang relihiosong pagtubod manongod sa ley nin Dios dapit sa dugo.
3. Anong mga hapot an maninigo na seryosong estudyaran kan mga magurang, asin taano?
3 Ano an Sasabihon kan Saindong Aki? Andam na daw na marhay an saindong mga aki na ipahayag an saindang saboot manongod sa ley nin Dios dapit sa dugo? Nagtutubod daw sinda nin bilog na puso na sarong pagboot nin Dios an ‘paglikay sa dugo’? (Gibo 15:29; 21:25) Ikakapaliwanag daw ninda an saindang pagtubod basado sa Kasuratan? Makosog daw an boot ninda na idepensa an saindang marigon na desisyon manongod sa dugo kun naniniwala an mga doktor na namemeligro an buhay ninda, dawa kun mayo an mga magurang ninda? Mantang “an panahon asin pagkanorongod nangyayari sa [sato] gabos,” paano nindo aandamon an saindong mga aki para sa ano man na dai linalaoman na pagbalo sa saindang integridad?—Ecl. 9:11; Efe. 6:4.
4, 5. (a) Ano an paninimbagan kan mga magurang, asin paano ninda iyan maootob? (b) Anong mga pantabang an makukua tangani na matabangan an mga magurang?
4 Mga Magurang, Ano an Puede Nindong Gibohon? May paninimbagan kamo na itokdo sa saindong mga aki an pagmansay nin Dios dapit sa dugo. (2 Tim. 3:14, 15) Makukua an malinaw na paliwanag sa librong Reasoning, pahina 70-4. Pag-adalan iyan nin maingat kaiba an saindong pamilya. Ginagamit an kabtang na “If Someone Says—” sa pahina 74-6, magkaigwa nin mga pag-ensayo kaiba kan saindong mga aki tangani na matabangan sinda na magkaigwa nin eksperyensia sa pagpaliwanag kun ano an tinutubod ninda asin kun taano. (1 Ped. 3:15) An iba pang pantabang para sa pagtokdo sa sato manongod sa isyu dapit sa dugo kaiba an brosyur na How Can Blood Save Your Life? asin An Torrengbantayan na Hunyo 15, 2004, pahina 14-24. Dugang pa, an mga video na Transfusion-Alternative Health Care—Meeting Patient Needs and Rights asin No Blood—Medicine Meets the Challenge, na makukua sa presente sa DVD may temang Transfusion Alternatives—Documentay Series, nagtatao nin nakakakombensir na impormasyon manongod sa pagigin rasonable asin pagigin epektibo nin pagbolong asin pag-operar na dai naggagamit nin dugo. Dinalan asin tinokar na daw kasuarin pa sana kan saindong pamilya an mga pasaleng ini?
5 Tabangan an saindong mga aki na ‘patunayan sa saindang sadiri kun ano an marahay, inaako, asin sangkap na kabotan nin Dios’ mapadapit sa dugo. Dangan puede na sindang gumibo nin maygurang na desisyon na may bendisyon ni Jehova.—Roma 12:2.