Gumibo nin mga Oportunidad na Maghulit
1 An Kristianong kongregasyon kompuesto nin mga tawo na laen-laen na marhay an kamugtakan. Pero, nagkakasararo kita sa satong determinasyon na omawon si Jehova. (Sal. 79:13) Kun an maluyang salud o iba pang masakit na mga kamugtakan nakakalimitar sa satong pakikikabtang sa pagbalangibog kan maogmang bareta, paano kita makakagibo nin mga oportunidad na maghulit?
2 Sa Aroaldaw na mga Aktibidad: Inaprobetsaran ni Jesus an saiyang aroaldaw na pakikiiba sa mga tawo tangani na magpatotoo. Nakipag-olay sia ki Mateo mantang nag-aagi sa may opisina nin buwis, ki Zaqueo mantang nagbabaklay, asin sa sarong Samaritana mantang nagpapahingalo. (Mat. 9:9; Luc. 19:1-5; Juan 4:6-10) Sa satong aroaldaw na mga aktibidad, makakapatotoo man kita sa siisay man na nakakaolay niato. An pirmeng pagdara nin Biblia, kaiba nin mga pulyeto o brosyur, maparigon sa boot niato na magin andam na magtaram manongod sa satong paglaom.—1 Ped. 3:15.
3 Nalilimitaran daw an pakikikabtang nindo sa pagharongharong huli ta kamo daing gayo nakakahiro? Magin listo sa mga oportunidad na magpatotoo sa nagdadalaw na medikal na mga personahe asin sa iba pa na nakakaolay nindo. (Gibo 28:30, 31) Kun kamo parateng nasa harong huli sa mga kamugtakan, naprobaran na daw nindong magpatotoo paagi sa telepono o paagi sa surat? An sarong tugang na babae regular na sinusuratan an mga kapamilya na bakong Saksi. Iiniiba nia dian an nakakaparigon sa boot na mga punto de vista hale sa Biblia asin an saiyang mga eksperyensia mantang naghuhulit.
4 Sa Trabaho o Eskuelahan: An pagmawot niato na omawon si Jehova mapahiro man sa sato na gumibo nin mga oportunidad na magtanom nin mga banhi nin katotoohan sa trabaho o eskuelahan. An sarong otso anyos na parahayag iinestorya sa saiyang klase an nabasa nia sa Awake! manongod sa bulan. Kan maaraman kun saen nia kinua an impormasyon na iyan, an maestra nia nagpoon nang umako nin regular kan An Torrengbantayan asin Awake! Sa pinagtatrabawohan, an pagkaigwa niato nin kopya kan librong Itinotokdo kan Biblia na naheheling nin iba puedeng magpahiro sa mga tawo na maghapot asin magtao sa sato nin oportunidad na magpatotoo.
5 Makakaisip daw kamo nin mga paagi na gumibo nin mga oportunidad na maghulit sa saindong aroaldaw na mga aktibidad? Paagi sa pag-aprobetsar sa satong mga kamugtakan, pagmaigotan logod niato kada aldaw na “magdolot sa Dios nin atang nin pag-omaw.”—Heb. 13:15.