Sinda Nagtao nin Halimbawa nin Kaimbodan
1 Kan taon 1954 nagpoon an sarong bagong klase nin bilog na panahon na paglilingkod sa Pilipinas—an aktibidad kan mga espesyal payunir. An may kakayahan na mga lalaki asin babae, na eksperyensiado sa Kristianong ministeryo, gikan sa boot na inako an mga asignasyon na maglingkod saen man sinda idestino kan organisasyon. Ngonyan, pakalihis nin mga dekada, an mga espesyal payunir padagos na nagtatao nin halimbawa nin kaimbodan na maninigong arogon.—Heb. 6:12.
2 Sinda an Nangenot: Sa kapinonan, pinangenotan kan mga espesyal payunir an paghuhulit sa mga teritoryo na mayo pang mga Saksi, nangorogna sa mga Isla nin Visayas asin Mindanao. Binalikan ninda an gabos na interesado asin nagkondukta nin mga pag-adal sa Biblia. Bilang resulta kan saindang maigot na mga paghihingoa, dakol na bagong kongregasyon an naorganisar. An saindang daing kapagalan na pag-ebanghelyo nagkontribwir sa makangangalas na paghiwas kan organisasyon na naheheling niato ngonyan. (Isa. 60:22) An mga espesyal payunir nagpapadagos sa saindang mahalagang kabtang sa pagpalakop kan maogmang bareta “sa gabos na linalang sa sirong nin langit.”—Col. 1:23.
3 Maninigong Arogon: An nagkapirang espesyal payunir dakol na dekada nang naglilingkod sa bilog na panahon na ministeryo. Sa nag-aging mga taon, dinalisay an pagtubod kan maimbod na mga lalaki asin babaeng ini sa irarom nin manlaenlaen na kamugtakan. (1 Ped. 1: 6, 7) Nagin andam sindang isakripisyo an materyal na mga kaginhawahan tanganing maglingkod sa mga lugar na may partikular na pangangaipo. An nagkapira ngonyan halangkaw na an edad asin maluya na an salud, o sinda napapaatubang sa ibang masakit na mga kamugtakan. (2 Cor. 4:16, 17) Pero, sinda ‘padagos pang nagtatalubo sa panahon nin pagkaubanon.’ (Sal. 92:14) Sinda nagtitiwala ki Jehova asin nakakaeksperyensia kan saiyang bendisyon.—Sal. 34:8; Tal. 10:22.
4 An mga espesyal payunir maninigo nanggad na tawan niato nin mamomoton na komendasyon. Kun kamo nagkapribilehio na magkaigwa nin mga espesyal payunir na idinestino sa saindong kongregasyon, aprobetsaran an oportunidad na makiibaiba sa sainda asin makinabang sa saindang eksperyensia. Ipaheling an pag-apresyar sa saindang paglilingkod bilang maimbod na mga parabalangibog kan Kahadean. Kumua kamo nin kosog gikan sa saindang karigonan. An gabos na nag-aarog sa saindang pagtubod puedeng magkamit man kan pabor asin bendisyon ni Jehova huling “an mga minagawe na may kaimbodan sarong kawilihan sa saiya.”—Tal. 12:22.