Bagong Programa sa Pansirkitong Asamblea

Si Jehova maninigo na pamurawayon. Paano niato pinapamuraway siJehova? Anong mga kadepisilan an napapaatubang sa nagkapira mapadapit digdi? Anong mga bendisyon an nakakamtan kan mga nagpapamuraway sa Dios ngonyan? An programa sa pansirkitong asamblea para sa 2008 matao nin nakakakontentong simbag sa mga hapot na ini. Iyan igwa nin temang “Gibohon an Gabos na Bagay sa Ikakamuraway nin Dios.” (1 Cor. 10:31) Isip-isipon an nakatagama para sa sato durante kan nagdadangadang na duwang aldaw na ini nin abundang espirituwal na instruksion.

Ipapahayag kan paraataman sa distrito an mga temang “Taano ta Dapat na Pamurawayon an Dios?” asin “Magin Arogan sa Pag-otob sa mga Kahagadan nin Dios.” Itatao nia an pampublikong pahayag na “Sairisay an mga Tawo na Nagpapamuraway sa Dios?,” asin an pantapos na pahayag na “May Pagkasararong Nagpapamuraway sa Dios sa Bilog na Kinaban.” Sia man an mangengenot sa Teokratikong Paadalan sa Pagmiministro. Ipapahayag kan paraataman sa sirkito an mga temang “Ikaogmang Marhay an Pagpabanaag kan Kamurawayan nin Dios,” “Pagtao nin Atension sa mga Pangangaipo kan Sirkito,” asin “Magdanay na ‘Marigon na Napapasikad sa Katotoohan,’” na basado sa 2 Pedro 1:12. Dugang pa, maaaraman niato kun paano “An Ministeryong Pagpapayunir Nagpapamuraway sa Dios.” An enot sa duwang nakakapukaw sa isip na simposium, na “Pagpamuraway sa Dios sa Gabos na Aspekto kan Satong Buhay,” sisiyasaton an rarom kan kahulogan kan ipinasabong na mga tataramon na yaon sa 1 Corinto 10:31. Totokaron kan simposium na “Pagtao nin Sagradong Paglilingkod Tanganing Omawon si Jehova” an manlaenlaen na aspekto kan satong pagsamba. Magkakaigwa kita kan sumaryo kan Torrengbantayan asin pagtokar kan pangaroaldaw na teksto sa Domingo. Magkakaigwa man nin oportunidad para sa bautismo.

An mayoriya kan katawohan habong midbidon an Dios. Dakol an nadidisturbong gayo kan mga plano nin tawo kaya dai na ninda hinohorophorop an pagigin kahangahanga ni Jehova. (Juan 5:44) Alagad kombensido kita na mahalaga an paggamit nin panahon tangani na pag-isipan an mga paagi na “Gibohon an Gabos na Bagay sa Ikakamuraway nin Dios.” Magplano kamong magin presente asin makinabang nin lubos sa gabos na apat na sesyon.