Iaalok an Espesyal na Isyu kan Awake! Durante kan Nobyembre!
1 Dakol na tawo an may sinserong mga hapot manongod sa kahalagahan kan Biblia. Kun isinurat iyan nin mga tawo, paano iyan maaapod na Tataramon nin Dios? Taano ta maninigo akong magtiwala dian bilang giya sa sakong mga lakad? Kun babasahon asin pag-aadalan ko an Biblia, ano an makukua kong mga pakinabang sa pagtao ko nin panahon asin paghihingoa? Arin na traduksion nin Biblia an maninigo kong gamiton? Ini an nagkapira sa mga hapot na sinisimbag sa espesyal na isyu kan Awake! na Nobyembre na may titulong “Can You Trust the Bible?”
2 Gugustohon niato na magin mahiwas an pagdistribwir sa satong teritoryo kan espesyal na isyung ini kan Awake! Kun posible, makikabtang sa ministeryong pagharongharong kaiba kan kongregasyon kada Sabado durante kan bulan nin Nobyembre. Ipaheling an isyung ini kan Awake! sa saindong mga paryente, pagtaraed, katrabaho, maestra, kaeskuela, asin mga dinadalaw liwat. Magdara nin mga kopya kun kamo namamakal asin nagbibiahe. Dinagka an kamagurangan na magpedido nin ekstrang mga kopya tanganing magkaigwa nin igong suplay an kongregasyon.
3 Pumoon nin Pag-adal sa Biblia: Kun makapasakamot kamo kan magasin na iyan, puede nindong ibugtak an pundasyon para sa sarong pag-adal sa Biblia bago taposon an saindong pakikipag-olay. Halimbawa, puede nindong sabihon, “Sa sunod, gusto kong ipaheling sa saindo an simbag kan Biblia sa hapot na ini, ‘Ano an katuyohan nin Dios para sa daga?’” Dangan magdalaw liwat na dara an librong Itinotokdo kan Biblia asin ipaheling sa kagharong an pahina 4-5, o pag-olayan an parapo 1-3 kan kapitulo 3. An saro pang puedeng sabihon iyo na, “Sa sunod, gusto kong ipakipag-olay an sarong hula sa Biblia na naootob na ngonyan mismo.” Sa pagdalaw liwat nindo, ipaheling sa kagharong an kapitulo 9 kan libro asin pag-olayan an parapo 1-3. O tibaad puedeng sabihon na sana nindo sa kagharong: “Dakol an nadedepisilan na masabotan an binabasa ninda sa Biblia. Sa sunod, gusto kong ipaheling sa saindo kun paano nindo mas masasabotan an saindong Biblia.” Sa pagdalaw liwat, iintrodusir an librong Itinotokdo kan Biblia, asin idemonstrar an sarong pag-adal.
4 An Biblia sana an igwa nin “banal na mga kasuratan,” na ‘nakakapagpadonong sa sato para sa kaligtasan.’ (2 Tim. 3:15) Kun siring, gugustohon niato gabos na magkaigwa nin maigot na pakikikabtang sa pagdistribwir kan espesyal na isyung ini kan Awake! tanganing tabangan an mga tawo na mapatalubo an tiwala sa Biblia!