Itatampok sa Setyembre an Espesyal na Isyu kan Awake!
1 Haros gabos na tawo naoogma sa huni nin mga gamgam asin sa tanawon na pagsolnop nin saldang. Minsan siring, dakol an habong midbidon na linalang kan sarong mamomoton na langitnon na Ama an mga bagay na ini. Magkakaigwa kita nin daing kaagid na oportunidad na magpatotoo sa pagigin Kaglalang ni Jehova paagi sa pagwaras nin sarong espesyal na isyu kan Awake! (Isa. 40:28; 43:10) An Setyembre na isyu eksklusibong nagtotokar kan temang “Is There a Creator?”
2 Sa Teritoryo: Kun posible, iareglo na makikabtang sa ministeryo sa harong-harong kaiba kan kongregasyon kada Sabado. Siempre, puede nindong ialok an espesyal na isyu sa ibang panahon durante kan semana. An mga paratokdo asin iba pa na nagtatrabaho sa langtad nin edukasyon posibleng marhay na magin interesado partikularmente sa isyung ini. Kun siring, puedeng gumibo nin espesyal na mga areglo na dalawon an siring na mga tawo na nasa teritoryo nindo.
3 Kun magpaheling nin interes an sarong indibiduwal, magwalat sa saiya nin sarong hapot na sisimbagon nindo sa masunod na pagdalaw. Halimbawa, puede kamong magpalataw nin sarong hapot manongod sa kun taano ta totogotan nin sarong mamomoton na Kaglalang an grabeng pagdusa. Dangan, sa pagdalaw liwat, puede nindong itampok an kapitulo 1 o kapitulo 11 kan librong Itinotokdo kan Biblia. O tibaad mas gusto nindong magpalataw nin sarong hapot manongod sa katuyohan kan Kaglalang para sa daga, dangan pag-olayan an kapitulo 3 sa pagdalaw liwat nindo.
4 Sa Eskuelahan: Kun kamo nag-eeskuela, taano ta dai regalohan nin espesyal na isyu kan Awake! an saindong mga paratokdo asin kapwa estudyante? An pagbugtak sana nin sarong kopya sa saindong desk tibaad magpahiro sa sainda na maghapot manongod sa satong mga tinutubod. Posibleng marhay na magkakaoportunidad kamo na gamiton an impormasyon hale dian kun idinedepensa sa klase an saindong pagtubod asin kun nag-aandam nin mga report. Tanganing matabangan kamo, an isyung ini igwa nin artikulong “Young People Ask” na may titulong “How Can I Defend My Belief in Creation?”
5 Si Jehova maninigong tawan nin onra asin kamurawayan huli sa saiyang mga linalang. (Kap. 4:11) Puede niatong tawan nin onra an satong Kaglalang asin tabangan an iba na gibohon man iyan paagi sa entusiastikong pag-alok kan isyu kan Awake! na Setyembre.