Aram daw Nindo an Saindong mga Pagpipilian?
Nagdadakol na an mga ospital sa bilog na kinaban na naggigibo nin operasyon na dai naggagamit nin dugo. Lubos daw kamong may kabatidan sa mga pagpipilian na pagbolong na dai naggagamit nin dugo? Kaipuhan nindong maaraman iyan tanganing makagibo kamo nin may kabatidan na mga desisyon may koneksion sa pagbolong asin pag-operar. Helingon an video na No Blood—Medicine Meets the Challenge. Pagkatapos kaiyan, repasohon na may kaibang pamibi an saindong nanodan sa tabang kan mga hapot na yaon sa ibaba.—Pasabot: Huling an video may kaibang halipot na mga eksena nin operasyon, nasa diskresion na nin mga magurang kun baga maninigo nindang iiba an saindang sadit na mga aki sa pagdalan kan video.
(1) Ano an pangenot na rason kun taano an Mga Saksi ni Jehova ta nagsasayumang magpaineksion nin dugo? (2) Kun mapadapit sa medikal na pag-asikaso, ano an mawot kan Mga Saksi ni Jehova? (3) Ano an pundamental na deretso nin mga pasyente? (4) Taano ta pagigin rasonable asin responsable na pumili nin mga alternatibo sa pag-ineksion nin dugo? (5) Kun may grabeng pagkawara nin dugo, ano an duwang apretadong prioridad nin mga doktor? (6) Ano an apat na prinsipyo nin alternatibong mga estratehiya sa pag-ineksion nin dugo? (7) Paano puedeng magibo nin mga doktor na (a) mainaan an pagkawara nin dugo, (b) mapreserbar an pulang mga selula, (c) maparikas an produksion nin dugo, asin (d) mabawi an nawarang dugo? (8) Iladawan an mga prosedimiento na inaapod na (a) hemodilution asin (b) cell salvage. (9) Ano an maninigo na booton nindong ipaaram sa saindo mapadapit sa ano man na alternatibo sa pag-ineksion nin dugo? (10) Puede daw na gumibo nin seryoso asin komplikadong mga operasyon na dai naggagamit nin pag-ineksion nin dugo? (11) Anong kapakipakinabang na pag-oswag an nangyayari sa laog kan medikal na komunidad?
An pag-ako sa nagkapira sa mga pagbolong na itinampok sa video personal na desisyon nin saro oyon sa saiyang konsensia na sinanay sa Biblia. Nakagibo na daw kamo nin malinaw na desisyon kun arin na mga pagbolong asin medikal na mga prosedimiento an andam nindong akoon para sa saindo asin sa saindong mga aki dangan ilinaag na daw nindo iyan sa DPA card? Para sa kompletong pagtokar sa mga bagay na ini, maingat na repasohon an “Mga Hapot Hale sa mga Parabasa” sa isyu kan An Torrengbantayan na Hunyo 15, 2004, asin Oktubre 15, 2000. Dangan gamiton an mga work sheet sa suplemento kan An Satong Ministeryo sa Kahadean na Enero 2007, na “Paano Ko Dedesisyonan an Manongod sa mga Fraction nin Dugo Asin an Medikal na mga Prosedimiento na Kalabot an Sadiri Kong Dugo?,” tanganing gumibo nin personal na mga desisyon nindo manongod sa kun anong mga opsion an akoon o sasayumahan nindo. Ultimo, seguradohon na ikinasurat nindo nin tama sa saindong DPA card an mga desisyon nindo. An pinili nindong mga representante sa pagpabolong asin an siisay man na mga kapamilyang bakong Saksi maninigong impormaran nin lubos manongod sa saindong mga desisyon.
[Kahon sa pahina 3]
• Nagdesisyon na daw kamo kun arin na mga pagbolong asin medikal na mga prosedimiento an andam nindong akoon para sa saindo asin sa saindong mga aki?
• Dinadara daw nindo an DPA card enkaso magkaemerhensia?