Inaatraso daw Nindo Iyan?
Inaatraso an ano? An pagsurat kan hinahagad na impormasyon sa DPA (durable power of attorney) card na itinatao sa bautisadong mga Saksi. Huling “dai nindo aram kun ano an magigin buhay nindo sa aga,” importante na magdesisyon kamo nin patienot asin isurat an mga pagbolong saka prosedimiento na aakoon nindo kun may medikal na emerhensia. (Sant. 4:14; Gibo 15:28, 29) Tanganing matabangan kamo, ginibo an video na Transfusion-Alternative Health Care—Meeting Patient Needs and Rights. Dalanon nindo iyan, dangan mapagngayongayong repasohon an nanodan nindo sa tabang kan mga kasunod na hapot.—Pasabot: Huling an video may kaibang halipot na mga eksena nin operasyon, nasa diskresion na nin mga magurang kun baga maninigo nindang iiba an saindang sadit na mga aki sa pagdalan kan video.
(1) Taano an nagkapira sa langtad nin pagbolong ta sinisiyasat giraray an pag-ineksion nin dugo? (2) Magtao nin tolong halimbawa nin komplikadong mga operasyon na nagibo nang mayo nin pag-ineksion nin dugo. (3) Pirang doktor asin siruhano sa bilog na kinaban an nagsabi na andam nindang bolongon an mga pasyente na mayong pag-ineksion nin dugo? Taano ta andam sindang gibohon iyan? (4) Ano an ihinayag kan dai pa sana nahahaloy na mga pagsiyasat sa ospital manongod sa paggamit nin dugo? (5) Anong mga peligro sa pagpabolong an kalabot sa pag-ineksion nin dugo? (6) Ano an nagin kongklusyon nin dakol na eksperto mapadapit sa mga pakinabang kan mga alternatibo sa pag-ineksion nin dugo? (7) Ano an dahelan nin kakulangan nin pulang selula kan dugo (anemia)? Sagkod saen iyan makakayanan nin mga tawo na mayo nin nakakadanyar na mga epekto? Ano an puedeng gibohon tangani na maremedyohan iyan? (8) Paano mapapadakol an pagprodusir nin pulang selula kan dugo sa hawak nin pasyente? (9) Anong mga pamamaagi an ginagamit tangani na mainaan an pagkawara nin dugo durante nin operasyon? (10) Magigin epektibo daw an mga alternatibo sa pag-ineksion nin dugo para sa sadit na mga aki o para sa mga tawo na namemeligrong magadan? (11) Ano an saro sa pangenot na moral na mga prinsipyo nin marahay na medikal na pag-asikaso? (12) Taano ta mahalaga na magdesisyon na nin patienot an mga Kristiano kun arin na mga pagbolong na dai magamit nin dugo an saindang aakoon? Paano niato ini magigibo?
An pag-ako sa nagkapira sa mga pagbolong na itinampok sa video personal na desisyon nin saro oyon sa saiyang konsensia na sinanay sa Biblia. Nakagibo na daw kamo nin malinaw na desisyon kun arin na mga pagbolong asin medikal na mga prosedimiento an andam nindong akoon para sa saindo asin sa saindong mga aki? Para sa mas kompletong pagtokar sa mga bagay na ini, helingon an “Mga Hapot Hale sa mga Parabasa” sa isyu kan An Torrengbantayan na Hunyo 15, 2004, asin Oktubre 15, 2000, saka an suplementong “Paano Ko Dedesisyonan an Manongod sa mga Fraction nin Dugo Asin an Medikal na mga Prosedimiento na Kalabot an Sadiri Kong Dugo?” sa isyu kan An Satong Ministeryo sa Kahadean na Enero 2007. An pinili nindong mga representante sa pagpabolong asin an siisay man na mga kapamilyang bakong Saksi maninigong impormaran nin lubos manongod sa saindong mga desisyon.