Sarong Video na Nagpapaliwanag nin Importanteng Medikal na Pamamaagi sa Presente
An mga eksperto sa ley asin pag-ataman sa salud nagtatao nin dugang pang atension sa moral na mga prinsipyo asin deretso nin mga pasyente. Huli kaini nagkaigwa nin bagong mga terapi asin pamamaagi na mapapakinabangan kan Mga Saksi ni Jehova. (Gibo 15:28, 29) Iyan an katuyohan kan video na Transfusion-Alternative Health Care—Meeting Patient Needs and Rights. Dalanon nindo iyan, dangan repasohon an nanodan nindo.—Pasabot: Huling an video may kaibang halipot na mga eksena sa operasyon, nasa diskresion na nin mga magurang kun baga maninigong dalanon an video kaiba kan saindang sadit na mga aki.
(1) Taano an nagkapira sa langtad nin pagbolong ta sinisiyasat giraray an pag-ineksion nin dugo? (2) Magtao nin tolong halimbawa nin komplikadong operasyon na puedeng gibohon na mayo nin pag-ineksion nin dugo. (3) Pirang doktor asin siruhano sa bilog na kinaban an nagsabi na andam nindang bolongon an mga pasyente na mayong pag-ineksion nin dugo? Taano ta andam sindang gibohon iyan? (4) Ano an ihinayag kan dai pa sana nahahaloy na mga pagsiyasat sa ospital manongod sa paggamit nin dugo? (5) Anong mga peligro sa pagpabolong an kalabot sa pag-ineksion nin dugo? (6) Ano an nagin konklusyon nin dakol na eksperto mapadapit sa mga pakinabang kan mga alternatibo sa pag-ineksion nin dugo? (7) Ano an dahelan nin kakulangan sa mapulang selula kan dugo (anemia)? Sagkod saen iyan makakayanan nin mga tawo na mayo nin nakakadanyar na mga epekto? Ano an puedeng gibohon tangani na maremedyohan iyan? (8) Paano mapapadakol an pagprodusir nin mapulang selula kan dugo sa hawak nin pasyente? (9) Anong mga pamamaagi an ginagamit tangani na mainaan an pagkawara nin dugo durante nin operasyon? (10) Magigin epektibo daw an mga alternatibo sa pag-ineksion nin dugo para sa sadit na mga aki o para sa mga tawo na namemeligrong magadan? (11) Ano an saro sa pangenot na moral na mga prinsipyo nin marahay na medikal na pag-asikaso? (12) Taano ta mahalaga na determinaran nin patienot kan mga Kristiano kun arin na mga pagbolong na dai magamit nin dugo an saindang aakoon? Paano niato ini magigibo?
An pag-ako nin nagkapirang pagbolong na itinampok sa video personal na desisyon nin saro oyon sa saiyang konsensia na sinanay sa Biblia. Nakapagdesisyon na daw kamo kun anong mga alternatibo sa pag-ineksion nin dugo an andam nindong akoon para sa saindong sadiri asin sa saindong mga aki? An mga kapamilya na bakong Saksi maninigo man na impormaran nin lubos manongod sa saindong mga desisyon asin mga rason para dian.—Helingon an “Mga Hapot Hale sa mga Parabasa” sa isyu kan An Torrengbantayan na Hunyo 15, 2004, asin Oktubre 15, 2000.