An Pinakahalangkaw na Kalidad nin Medikal na Pag-asikaso—Ano daw Iyan?
“An siisay man na pasyente na nag-ako nin pagbolong na dai naggamit nin dugo, sa pundamental, nag-ako kan pinakahalangkaw na kalidad nin operasyon na posible.” Iyan an sabi ni Dr. Michael Rose, direktor sa medisina asin anestesiologo. Anong mga prosedimiento asin alternatibo sa pag-ineksion nin dugo an puedeng iiba sa “pagbolong na dai naggagamit nin dugo”? Kaipuhan nindong maaraman iyan tanganing makagibo kamo nin may kabatidan na mga desisyon may koneksion sa pagbolong asin operasyon. Dalanon an video na No Blood—Medicine Meets the Challenge. Pagkatapos, baloon an saindong pakasabot paagi sa minasunod na mga hapot.—Pasabot: Huling an video may kaibang halipot na mga eksena sa operasyon, nasa diskresion na nin mga magurang kun baga dadalanon iyan kaiba kan sadit na mga aki.
(1) Ano an pangenot na rason kun taano an mga Saksi ni Jehova ta nagsasayumang magpaineksion nin dugo? (2) Kun mapadapit sa medikal na pag-asikaso, ano an mawot kan mga Saksi ni Jehova? (3) Ano an pundamental na deretso nin mga pasyente? (4) Taano ta rasonable asin responsable na pumili nin mga alternatibo sa pag-ineksion nin dugo? (5) Kun may grabeng pagkawara nin dugo, ano an duwang apretadong prioridad nin mga doktor? (6) Ano an apat na prinsipyo nin alternatibong mga estratehiya sa pag-ineksion nin dugo? (7) Paano puedeng magibo nin mga doktor na (a) mainaan an pagkawara nin dugo, (b) maingatan an pulang mga selula nin dugo, (c) maparikas an produksion nin dugo, asin (d) mabawi an nawarang dugo? (8) Iladawan an mga prosedimiento na inaapod na (a) hemodilution asin (b) cell salvage. (9) Ano an maninigo na booton nindong ipaaram sa saindo mapadapit sa ano man na alternatibo sa pag-ineksion nin dugo? (10) Puede daw na gumibo nin seryoso asin komplikadong mga operasyon na dai naggagamit nin pag-ineksion nin dugo? (11) Anong kapakipakinabang na pag-oswag an nangyayari sa laog kan medikal na komunidad?
An pag-ako nin nagkapira sa mga pagbolong na itinampok sa video personal na desisyon nin saro oyon sa saiyang konsensia na sinanay sa Biblia. Nakapagdesisyon na daw kamo kun anong mga alternatibo sa pag-ineksion nin dugo an andam nindong akoon para sa saindong sadiri asin sa saindong mga aki? An mga kapamilya na bakong Saksi maninigo man na impormaran nin lubos manongod sa saindong mga desisyon asin mga rason para dian.—Helingon an “Mga Hapot Hale sa mga Parabasa” sa isyu kan An Torrengbantayan na Hunyo 15, 2004, asin Oktubre 15, 2000.